यवतमाळ : ‘एआय’ (AI) तंत्रज्ञानाचा गैरवापर करून एका महाविद्यालयीन तरुणीचे आक्षेपार्ह फोटो सोशल मीडियावर व्हायरल केल्याचा धक्कादायक प्रकार यवतमाळमध्ये उघडकीस आला आहे. या प्रकरणी पीडित तरुणीच्या तक्रारीवरून शहर पोलिसांनी चार नामांकित सोशल मीडिया अकाऊंट्स आणि फेक आयडी धारकांसह एकूण पाच जणांविरोधात गुन्हा दाखल केला आहे.
प्रथमेश सर्वे, तसेच ‘रेड झोन ४७’, ‘गौरी ५९१’, ‘मिस डेव्हिल’ आणि एका फेक इंस्टाग्राम आयडीचा वापर करणाऱ्या अज्ञात व्यक्तीविरोधात हा गुन्हा नोंदवण्यात आला आहे.
हा संपूर्ण प्रकार २३ ते २८ जून या कालावधीत घडला. आपले फोटो सोशल मीडियावर व्हायरल झाल्याचे लक्षात येताच पीडित तरुणीने तात्काळ शहर पोलीस ठाण्यात धाव घेऊन तक्रार नोंदवली. प्रकरणाचे गांभीर्य ओळखून पोलिसांनी तातडीने संबंधित इंस्टाग्राम आयडी धारकांविरुद्ध गुन्हा दाखल केला आहे. शहर पोलीस ठाण्याच्या ठाणेदारांच्या मार्गदर्शनाखाली या प्रकरणाचा पुढील तपास सुरू आहे.