यवतमाळ : पैशासाठी मुलाने केला आईचा खून; आरोपीस अटक

यवतमाळ; पुढारी वृत्तसेवा : पैशासाठी विळ्याने वार करून मुलाने आईची हत्या केल्याची घटना बुधवारी (दि. १०) कळंब तालुक्यातील हिवरादरणे येथे घडली. बेबीबाई अशोक चाडगे (५६, रा. हिवरादरणे), असे मृत महिलेचे नाव आहे. याप्रकरणी आरोपी मुलगा नितीन अशोक चाडगे (३५, रा. हिवरा दरणे) याला कळंब पोलिसांनी अटक केली.

बेबीबाई यांच्या पतीचे काही वर्षांपूर्वी निधन झाले. तिने तीनही मुलांना मोठे काबाडकष्ट करून लहानाचे मोठे केले. मोठा मुलगा नितीनचे लग्न करून दिले. काही दिवसानंतर नितीन व्यसनाच्या आहारी गेला. त्याचे व्यसन आणि त्रासाला कंटाळून त्याची पत्नी मुलांना घेऊन माहेरी निघून गेली. त्यामुळे तो आई बेबीबाईकडेच राहायचा. कामावर लक्ष नसल्याने नितीन कर्जबाजारी झाला होता. गरजा पूर्ण करण्यासाठी तो आईच्या मागे तगादा लावायचा. शेती विकण्यासाठी आग्रह धरायचा. केवळ दीड एकर असलेली शेती विकण्यास आईचा विरोध होता. शेती विकून कर्ज फेडण्यासाठी पैसे देत नसल्याच्या रागातून नितीनने आईवर विळ्याने वार केले. त्यात तिचा जागीच मृत्यू झाला. याप्रकरणी मुलगा मंगेश यांच्या तक्रारीवरून नितीन चाडगे यांच्याविरुद्ध खुनाचा गुन्हा दाखल करून अटक केली. .