वाशीम : रिसोडमध्ये पोलिसांनी केलेल्या एका कारवाईमुळे मोठी खळबळ उडाली आहे. दिनांक २ नोव्हेंबर रोजी, रिसोड शहरातील अमरदास नगर परिसरात पोलिसांनी एका अतिशय धाडसी कारवाईत अमली पदार्थ , गांजा आणि लाखो रुपयांच्या बनावट नोटांचा साठा जप्त केला आहे.
उपविभागीय पोलीस अधिकारी कार्यालयाच्या विशेष पथकाने गोपनीयतेने मिळालेल्या माहितीच्या आधारे ही धडाकेबाज कारवाई केली. या कारवाईमुळे रिसोडमधील गुन्हेगारीच्या मुळांना जोरदार हादरा बसला असून, अंदाजे १८ ते २० लाख रुपयांचा मुद्देमाल जप्त करण्यात आला आहे, तर दोन मुख्य आरोपींना जागीच अटक करण्यात आली आहे.
रिसोड शहरातील अमरदास नगर भागात एका ग्रे रंगाच्या बलेनो कारबद्दल पोलिसांना संशय होता. या माहितीच्या आधारे, उपविभागीय पोलीस अधिकारी नवदीप अग्रवाल यांच्या मार्गदर्शनाखाली, रिसोड आणि मालेगाव पोलीस ठाण्याच्या संयुक्त आणि आक्रमक पथकाने क्षणार्धात घटनास्थळी धाड टाकली. कारची कसून तपासणी केली असता, एमडीएम ड्रग्ज सारखा दिसणारा पांढरा पदार्थ, गांजा आणि मोठ्या प्रमाणात बनावट नोटांचा गठ्ठा आढळला.
६० ग्रॅम वजनाचा एमडीएम (मेथिलिन डाइऑक्सि मेथेमफेटामाइन) सारखा पांढरा पदार्थ. सुमारे २ किलो गांजा. ३७८ पाचशे रुपयांच्या बनावट नोटा एकूण किंमत सुमारे १ लाख ८९ हजार रुपये. गुन्ह्यात वापरलेली ग्रे रंगाची बलेनो कार, दोन मोबाईल फोन आणि अन्य साहित्य. जप्त केलेल्या संपूर्ण मुद्देमालाची किंमत अंदाजे १८ ते २० लाख रुपये इतकी आहे.
घटनेची माहिती मिळताच, उपविभागीय पोलीस अधिकारी नवदीप अग्रवाल यांनी स्वतः घटनास्थळी धाव घेतली आणि संपूर्ण परिस्थितीची गंभीरता लक्षात घेऊन पाहणी केली. त्यांनी संबंधित पोलिसांना या प्रकरणाचा संपूर्ण छडा लावण्यासाठी कठोर आणि आवश्यक त्या पुढील तपासाच्या सूचना दिल्या आहेत. या अत्यंत गंभीर प्रकरणाचा तपास रिसोड पोलीस स्टेशनचे पोलीस निरीक्षक रामेश्वर चव्हाण यांच्या सजग मार्गदर्शनाखाली युद्ध पातळीवर सुरू आहे.रिसोड शहरासारख्या शांत परिसरात अशा प्रकारचे अमली पदार्थ व बनावट नोटांचे घृणास्पद प्रकरण उघडकीस आल्याने नागरिकांमध्ये मोठी खळबळ आणि संतापाची भावना पसरली आहे.
राज्याबाहेरचे 'कनेक्शन' असल्याची शक्यता
कारवाईत सहभागी झालेल्या पोलिसांनी आरोपींना घटनास्थळीच मुसक्या आवळल्या. सूत्रांच्या माहितीनुसार, या संवेदनशील प्रकरणाचे धागेदोरे केवळ रिसोडपर्यंत मर्यादित नसून, राज्याबाहेरील काही मोठ्या व्यक्तींशी जोडले गेले असण्याची प्रबळ शक्यता पोलिसांनी वर्तवली आहे. हे अंमली पदार्थ व बनावट नोटांचे विशाल जाळे बाहेर राज्यातून संचालित होत असल्याचा पोलिसांना प्रबळ संशय आहे.