वाशिम : महाराष्ट्र शासनाच्या गृह विभागाने ३० एप्रिल २०२६ रोजी राज्यातील वरिष्ठ पोलीस अधिकाऱ्यांच्या बदल्यांचे नवीन आदेश निर्गमित केले आहेत. या आदेशानुसार वाशिम जिल्ह्याच्या पोलीस अधीक्षक पदावर महत्त्वाची भाकरी फिरवण्यात आली असून, जिल्ह्याची धुरा आता आयपीएस (IPS) नितेश खाटमोडे यांच्याकडे सोपवण्यात आली आहे.
पुणे येथील अमली पदार्थ विरोधी टास्क फोर्सचे (Anti-Narcotics Task Force) पोलीस अधीक्षक नितेश खाटमोडे यांची वाशिमचे नवीन पोलीस अधीक्षक म्हणून नियुक्ती करण्यात आली आहे. खाटमोडे यांनी यापूर्वी गडचिरोलीसारख्या नक्षलग्रस्त भागात अप्पर पोलीस अधीक्षक म्हणून उल्लेखनीय कार्य केले आहे.
वाशिमचे विद्यमान पोलीस अधीक्षक अनुज मिलिंद तारे यांची बदली पुणे येथे करण्यात आली आहे. ते नितेश खाटमोडे यांच्या जागी अमली पदार्थ विरोधी टास्क फोर्सचे प्रमुख म्हणून पदभार स्वीकारतील. दरम्यान, पुणे शहराचे पोलीस उपायुक्त राजकुमार शिंदे यांची वाशिमऐवजी आता पोलीस अधीक्षक (लोहमार्ग, पुणे) या पदावर बदली करण्यात आली आहे.
एक शिस्तप्रिय आणि 'ॲक्शन मोड'मधील अधिकारी म्हणून नितेश खाटमोडे यांची ओळख आहे. ते मूळचे सातारा जिल्ह्यातील रहिवासी असून त्यांनी अभियांत्रिकीचे (Engineering) शिक्षण पूर्ण केले आहे. त्यांच्या तांत्रिक पार्श्वभूमीमुळे गुन्हे अन्वेषणात सायबर आणि डिजिटल पुराव्यांचा प्रभावी वापर करण्यात त्यांचा हातखंडा मानला जातो.
नक्षलविरोधी कारवाया आणि दुर्गम भागातील पोलीस यंत्रणा हाताळण्याचा त्यांना दांडगा अनुभव आहे. अवैध धंदे आणि गुंडगिरीविरुद्ध कठोर भूमिका घेणारे अधिकारी म्हणून ते परिचित असल्याने, त्यांच्या नियुक्तीमुळे वाशिम जिल्ह्यातील गुन्हेगारांवर वचक निर्माण होऊन कायदा व सुव्यवस्था अधिक मजबूत होईल, अशी शक्यता वर्तवण्यात येत आहे.