Washim Illegal Cattle Transportation
वाशीम : वाशीम जिल्ह्यात गोवंशाची अवैध वाहतूक करणारे दोन ट्रक बजरंग दलाच्या कार्यकर्त्यांनी तोंडगाव टोलनाक्यावर अडवून पोलिसांच्या ताब्यात दिले. या प्रकरणी संबंधित वाहनचालकांविरुद्ध कायदेशीर कारवाईची प्रक्रिया सुरू करण्यात आली आहे.
बजरंग दलाच्या कार्यकर्त्यांनी दिलेल्या माहितीनुसार, नागपूरहून दोन ट्रकमधून गोवंशाची अवैध वाहतूक होत असल्याची गुप्त माहिती त्यांना मिळाली होती. त्यानुसार नांदेड–अकोला महामार्गावरील तोंडगाव टोलनाक्यावर दोन्ही वाहने अडविण्यात आली.
तपासणीदरम्यान दोन्ही ट्रकमध्ये मिळून सुमारे २५ गोवंश आढळून आले. जनावरांची कोंबून व अमानुष पद्धतीने वाहतूक केली जात असल्याचा आरोप कार्यकर्त्यांनी केला. घटनेची माहिती मिळताच पोलिसांनी घटनास्थळी धाव घेत दोन्ही वाहने आणि गोवंश ताब्यात घेतला.
या प्रकरणी ट्रकचालक गजानन राऊत (रा. मंगरुळपीर) आणि देवराव बर्गे (रा. दापोरी, ता. कळमनुरी, जि. हिंगोली) यांच्याविरुद्ध संबंधित कायद्यांनुसार कारवाईची प्रक्रिया सुरू असल्याची माहिती पोलिसांनी दिली.