Washim news:
वाशीम : रिसोड शहरातील हिंगोली मार्गावरील छत्रपती संभाजीनगर परिसरात आज सकाळी साडेसातच्या सुमारास पती-पत्नीमध्ये झालेल्या किरकोळ वादातून पतीने पत्नीवर धारदार शस्त्राने वार करून तिची निर्घृण हत्या केल्याची घटना घडली. कल्पना योगेश ढवळे (वय ३५) असे मृत महिलेचे नाव असून, या घटनेमुळे परिसरात खळबळ उडाली आहे.
हल्ल्यात गंभीर जखमी झालेल्या कल्पना यांना प्रथम रिसोड येथील ग्रामीण रुग्णालयात उपचारासाठी दाखल करण्यात आले. मात्र, उपचारादरम्यान त्यांचा मृत्यू झाला. घटनेनंतर संशयित आरोपी पती योगेश ढवळे पळून गेला होता. मात्र, पोलिसांनी तत्परतेने कारवाई करत त्याला ताब्यात घेतले.
ही घटना घडत असताना मृत महिलेच्या मुलाने हा प्रकार पाहून आरडाओरडा केला. त्यानंतर महिलेचे नातेवाईक आणि परिसरातील काही नागरिकांनी घटनास्थळी धाव घेत जखमी महिलेला रुग्णालयात दाखल केले.
पती योगेश ढवळे हा मूळचा वाशीम येथील काळे फैल परिसरातील रहिवासी असल्याचे समजते. तो गेल्या काही वर्षांपासून परभणी येथे स्थायिक झाला होता. योगेश ढवळे हा एका खासगी कंपनीत नोकरीला असून, सुमारे पंधरा दिवसांपूर्वी तो रिसोड शहरातील छत्रपती संभाजीनगर परिसरात एका घरात भाड्याने राहायला आला होता.
घटनेची माहिती मिळताच रिसोड पोलीस ठाण्याचे निरीक्षक रामेश्वर चव्हाण हे पोलीस कर्मचाऱ्यांसह घटनास्थळी दाखल झाले. या प्रकरणी पोलिसांकडून पुढील कारवाई सुरू आहे.