समृद्धी महामार्गांवर पुणे-नागपूर लक्झरी बसला अपघात; १ ठार २५ जण जखमी

वाशीम : अजय ढवळे

आज सकाळी ५ वाजण्याच्या सुमारास पुण्यावरून नागपूरकडे जात असलेल्या MH 12 HG 6667 क्रमांकाच्या RLT राजलक्ष्मी ट्रॅव्हलच्या बसचा अपघात झाला. समृद्धी महामार्ग चॅनेल नं 215 वर नागपूर लेनवर वनोजा टोल प्लाझा पासून मालेगावकडे अंदाजे 5 किमीवर चालकाचे नियंत्रण सुटल्याने किंवा झोपेची डुलकी आल्याने अपघात झाल्याचा माहिती समोर येत आहे. या अपघातात एक जन ठार झाला असून, पाच ते सहा गंभीर जखमी झाले आहेत. तर 20 ते 25 जण किरकोळ जखमी असल्याची माहिती मिळाली आहे.

दरम्‍यान अपघातामधील जखमी प्रवाशांना उपचारासाठी कारंजा आणि अकोला येथे रवाना करण्यात आले आहे. घटनास्थळी वाशिम मंगरूळपीर मतदारसंघाचे आमदार श्याम खोडे, निवासी उपजिल्हाधिकारी विश्वनाथ घुगे, मंगरूळपीरच्या तहसीलदार शितल बंडगर, ठाणेदार सुधाकर आडे यांनी घटनास्थळी दाखल होत अपघाताबाबत माहिती घेतली. अपघाताची माहिती मिळताच घटनास्थळी धाव घेत शेलुबाजार येथील सामाजिक कार्यकर्ते पांडुरंग कोठाळे, साई मंदिर येथे सकाळी व्यायाम करणारे नागरिक यांच्यासह वनोजा येथील नागरिकांनी जखमींना बाहेर काढून उपचारासाठी पाठवण्याकरिता मदत केली.