नागपूर : शेतकऱ्यांच्या मागण्यांसाठी सुरू असलेल्या प्रहारचे नेते बच्चू कडू यांच्या दोन दिवसापासूनच्या आंदोलनामुळे नागरिकांना होत असलेल्या मनस्तापाची अखेर मुंबई उच्च न्यायालयाच्या नागपूर खंडपीठाने बुधवारी (दि.२९) गंभीर दखल घेतली. बच्चू कडू यांनी महामार्ग व इतर सर्व रस्ते तातडीने शांततापूर्ण पद्धतीने मोकळे करावे, असा आदेश दिला.
या प्रकरणावर न्यायमूर्ती रजनीश व्यास यांच्यासमक्ष सुनावणी झाली. दरम्यान, रोखलेले मार्ग मोकळे करताना बच्चू कडू व त्यांच्या समर्थकांनी सार्वजनिक मालमत्तेचे नुकसान केल्यास त्यांच्यावर कडक कारवाई केली जाईल, असा इशाराही न्यायालयाने दिला आहे. आदेशाचे पालन करण्यास नकार दिल्यास आणि मार्ग मोकळे न केल्यास पोलिस आयुक्त, पोलिस अधीक्षक, अतिरिक्त पोलिस महासंचालक व इतर पोलिस अधिकाऱ्यांनी सर्व मार्ग मोकळे करण्यासाठी व वाहतूक सुरळीत करण्यासाठी तातडीने आवश्यक कारवाई करावी, असे निर्देश दिले.
आदेशाचे पालन आज सायंकाळी ६ वाजेपर्यंत करण्यात यावे, असेही बजावले. याशिवाय, पोलिस आयुक्तांना उद्या सकाळी ११ वाजेपर्यंत आदेशाच्या अंमलबजावणीचा अहवाल मागितला. दिव्यांग व्यक्ती, ज्येष्ठ नागरिक, महिला व मुले यांना सन्मानपूर्वक बाहेर काढावे, असेदेखील न्यायालयाने स्पष्ट केले. यासोबतच आंदोलनाकरिता २६ ऑक्टोबर रोजी दिलेल्या आदेशाचे उल्लंघन झाल्यामुळे आंदोलकांवर कायद्यानुसार कारवाई करावी, असेसुद्धा न्यायालयाने सांगितले.