नागपूर : पुढारी वृत्तसेवा
नागपुरातील भांडेवाडी डंपिंग यार्डला काल (शनिवार) लागलेली भीषण आग आज (रविवार) सकाळी नियंत्रणात आली असली, तरी दुसऱ्या दिवशीही धुमसतच आहे. तुलसी नगर, अंतूजी नगर वस्तीकडून मनपा अग्निशमन विभागाचे 4 फायर टेंडर अजुनही आग विझविण्याचा प्रयत्न करीत आहेत.
या डंपिंग आगीतून विषारी धूर वातावरणात पसरत असल्याने नागरिक दहशतीत आहेत. आरोग्याचा प्रश्न निर्माण झाला आहे. काल नागपुरात या उन्हाळ्यातील सर्वाधिक 44.7 अंश सेल्सिअस तापमान नोंद झाली. या भीषण आगीने यात अधिक भर घातली. मानेवाडा परिसरात तसेच इतर भागात विजेचा लपंडाव रात्रभर सुरू होता. पूर्व नागपुरातील भांडेवाडी परिसरात असलेल्या कचरा डम्पिंग यार्डमध्ये साठविलेल्या कचऱ्याच्या ढिगाऱ्याला शनिवारी दुपारपासून भीषण आग लागली.
नागपूर शहर तसेच ग्रामीण मधील 11 फायर टेंडर आग नियंत्रणाचे काम करीत आहेत. या आगीचा धूर परिसरातील पवनशक्तीनगर, सूरजनगर, संघर्षनगर, अब्बूमियाँनगर, तुलसीनगरात पसरलेला आहे. एक अग्निशमन गाडी देखील या आगीत जळाली. आजवर अनेकदा छोट्या मोठ्या आगीच्या घटना घडल्या. मात्र, कचऱ्याचे उंच पहाडासारख्या ढिगाऱ्याला लागलेली ही भीषण आग कशामुळे लागली हे अद्यापही स्पष्ट झालेले नाही.