नागपूर - शहरातील नागरिकांच्या सुरक्षेच्या दृष्टीने लावण्यात आलेले पण बंद व नादुरुस्त सीसीटीव्ही कॅमेरे पुन्हा संचालित करुन शहरातील रस्ते, गल्लोगल्ली तसेच सर्व भाग सीसीटीव्ही कॅमेऱ्याच्या निगराणीमध्ये आणा, असे निर्देश महसूल मंत्री व नागपूर जिल्ह्याचे पालकमंत्री चंद्रशेखर बावनकुळे यांनी आज शुक्रवारी दिले.
शहरात सुरक्षेच्या दृष्टीने एकूण ३६०० सीसीटीव्ही कॅमेरे लावण्यात आले आहेत. यापैकी काहींमध्ये बिघाड आल्यामुळे बंदवस्थेत असल्याचे त्यांनी सांगितले. शहरातील सीसीटीव्ही कॅमेरांची यंत्रणा अधिक अद्ययावत करण्याची गरज असून यासाठी निधीची कमतरता पडू दिली जाणार नाही. नव्याने शहरातील सर्व भागात सीसीटीव्ही कॅमेरा लावण्यात येतील. जास्तीत जास्त भाग कव्हर व्हावा यादृष्टीने ठिकाण निवडण्यात यावेत. आवश्यकता भासल्यास खासगी जागेमध्ये देखील कॅमेरांचे खांब लावण्यात यावे. यासाठी नागरिकांमध्ये जनजागृती करावी, असेही निर्देश बावनकुळे यांनी दिले.
नागरिकांच्या घरामधील सीसीटीव्हीची कनेक्टिव्हिटी पोलीस यंत्रणेकडे घेण्याबाबत पडताळणी करण्याची सूचनाही त्यांनी केली. जिल्हा नियोजन भवन येथील सभागृहात आढावा बैठकीत पोलीस आयुक्त डॉ. रवींद्र कुमार सिंगल, मनपा आयुक्त तथा प्रशासक डॉ. अभिजीत चौधरी, जिल्हाधिकारी डॉ. विपीन इटनकर, मनपा उपायुक्त विनोद जाधव यांच्यासह पोलिस, मनपा आणि जिल्हा प्रशासनाचे अधिकारी उपस्थित होते. ई-गव्हर्नन्स महाव्यवस्थापक डॉ. शील घुले यांनी विस्तृत माहिती सादर केली.