गोंदिया : गोंदिया वनविभागांतर्गत येणाऱ्या उत्तर देवरी तसेच तिरोडा वनपरिक्षेत्रात घडलेल्या दोन वेगवेगळ्या घटनात दोन बिबट्यांचा मृत्यू झाल्याची घटना आज, सोमवार ( दि. २८) सकाळी ९ व दुपारी १२ वाजताच्या सुमारास उघडकीस आली.
गेल्या महिन्यात झुंजीत वाघ व बिबट्या ठार झाल्याची घटना घडली असताना आता आणखी दोन बिबट्यांचा मृत्यू झाल्याने वन्यजीव प्रेमींकडून नाराजी व्यक्त करण्यात येत आहे. दरम्यान आज घडलेल्या पहिल्या घटनेत उत्तर देवरी वनपरिक्षेत्रांतर्गत सहवनक्षेत्र सावली नियतक्षेत्र डोंगरगांव १ मधील क्रमांक ५५५ (संरक्षीत वन) येथे सकाळी ९ वाजताच्या सुमारास वन कर्मचारी गस्तीवर असताना सिमेंट बंधाऱ्याच्या चिखलातील गाढेमध्ये एक बिबट्या फसुन मृत अवस्थेत पडुन असल्याचे दिसून आले. घटनेची माहिती प्राप्त होताच उत्तर दवेरी वनपरिक्षेत्राचे वनपरिक्षेत्र अधिकारी, क्षेत्र सहाय्यक, वनरक्षक, पशुवैद्यकिय अधिकारी यांनी घटनास्थळाची पाहणी केली.
यावेळी मृत बिबट्याचे सर्व अवयव साबुत असून सिमेंट बंधाऱ्याच्या चिखलातील गाढेमध्ये फसुन मृत्यू झाल्याचे प्राथमिकरित्या दिसून आले. तर दुसर्या घटनेत तिरोडा वनपरिक्षेत्रांतर्गत वडेगाव सहवनक्षेत्रातील भजेपार नियतक्षेत्रात कक्ष क्रमांक ६५ संरक्षीत वन क्षेत्रात अंदाजे दुपारी १२ वाजताच्या सुमारास एक बिबट्या मृतावस्थेत असल्याची माहिती तिरोडा वनपरिक्षेत्राचे वनपरिक्षेत्र अधिकारी यांना प्राप्त होताच त्यांनी वन विभागाचे पथक व पशुवैद्यकिय अधिकारी यांचेसह घटनास्थळ गाठून पाहणी केली असता, मृत बिबट्याचे सर्व अवयव शाबुत असल्याचे दिसून आले. तर या बिबटचा मृत्यू झाडावरुन पडून पोटाच्या भागात गंभीररित्या जखमी होवून झाल्याचे प्राथमिकरित्या दिसून आले आहे.
सदर दोन्ही घटनास्थळी गोंदियाचे उपवनसंरक्षक प्रमोदकुमार पंचभाई, सहा. वनसंरक्षक (रोहयो व वन्यजीव) सचिन डोंगरवार, मानद वन्यजीव रक्षक सावन बहेकार, हिरवळ बहुददेशिय संस्था गोंदियाचे संचालक रुपेश निंबार्ते यांचेसह उत्तर देवरी तसेच तिरोडाचे वनपरिक्षेत्र आधिकारी यांनी भेट देवून पाहणी केली. पुढील तपास उपवनसंरक्षक प्रमोद पंचभाई यांच्या मार्गदर्शनाखाली सहाय्यक वनसंरक्षक (रोहयो व वन्यजीव) करीत आहेत.
अधिकाऱ्यांच्या भेटीनंतर मृत बिबट्यांच्या शवाची तपासणी केल्यानंतर दोन्ही मृत बिबट्यांचे शव विच्छेदन करण्यात आले. दरम्यान, मृत बिबट्यांच्या अवयवाचे नमुने उत्तरीय तपासणी करीता सिलबंद करण्यात आले. तसेच सर्व वन अधिकारी व कर्मचाऱ्यांच्या उपस्थितीत मृत बिबट्यांवर अंत्यसंस्कार करण्यात आले.