गोंदियाः हेटी (पालेवाडा) येथे तीन वर्षीय चिमुकलीचा संशयास्पद मृत्यू झाल्याची घटना शुक्रवारी (ता. २७) उघडकीस आली. या प्रकरणी मृत चिमुकलीच्या मोठ्या बहिणीच्या तक्रारीवरून गोरेगाव पोलिसात गुन्हा नोंद करण्यात आला असून, मृताची आईच संशयाच्या भोवऱ्यात आहे. दरम्यान, संशयाच्या आधारे पोलिसांनी २४ तासानंतर खड्ड्यात पुरलेला मृतदेह बाहेर काढून उत्तरीय तपासणीसाठी पाठवलेला आहे. मानसी ताराचंद चामलाटे (वय ३) असे मृत मुलीचे नाव आहे.
मानसी ही आई गुनिता ताराचंद चामलाटेसोबत नागपूर जिल्ह्यातील खापरखेडा परिसरातील नांदा येथे वास्तव्यास होती. याठिकाणीच गुरुवार, २६ डिसेंबर रोजी सायंकाळच्या सुमारास मानसीचा मृत्यू झाला. यावेळी मुलीचा मृतदेह घेऊन मानसीची आई गुनिता चामलाटे ही आपल्या स्वगावी पालेवाडा हेटी येथे आली. यावेळी गावकऱ्यांना विश्वासात घेऊन प्रकृती बरी नसल्याने मानसीचा मृत्यू झाला, असे तिने सांगितले. दरम्यान, शुक्रवार, २७ डिसेंबर रोजी दुपारी १२ ते १ च्या सुमारास गावातीलच स्मशानभूमीत मानसीचा दफनविधी कार्यक्रम पार पडला.
मात्र, मानसीच्या मृत्यू मागे काहीतरी गुढ असावे असा संशय तिच्या नातेवाईकांनी व्यक्त केल्यानंतर मृत मानसीची मोठी बहिण कलाबाई ताराचंद चामलाटे यांनी शुक्रवारी (ता.२७) रात्री अकराच्या सुमारास गोरेगाव पोलिसात तक्रार दाखल केली. या तक्रारीची दखल घेत शनिवारी (ता. २८) डिसेंबर रोजी गोरेगाव पोलिसांनी तहसीलदार व तिरोडा येथील उपविभागीय अधिकारी यांच्या समक्ष हेटी येथील स्मशानभूमीत पुरण्यात आलेला मृतदेह बाहेर काढला. घटनास्थळाचा पंचनामा करून मृतदेह शवविच्छेदनासाठी गोंदिया येथील केटीएस रुग्णालय पाठवला. यासंदर्भात गोरेगाव पोलिसात मर्ग नोंद करण्यात आला असून तपास सुरू आहे. मृत मानसीची आई गुनिता ताराचंद चामलाटे हिला चौकशीसाठी ताब्यात घेण्यात आल्याची माहिती आहे.