गडचिरोली: काँग्रेसचे ज्येष्ठ नेते आणि निष्ठावंत कार्यकर्ते म्हणून ओळखले जाणारे अॅड. रवींद्र दरेकर यांची महाराष्ट्र प्रदेश काँग्रेस कमिटीच्या सरचिटणीसपदी नियुक्ती करण्यात आली आहे. अखिल भारतीय काँग्रेस कमिटीचे सरचिटणीस के. सी. वेणुगोपाल यांनी प्रदेशाध्यक्ष हर्षवर्धन सपकाळ यांच्या नेतृत्वाखालील नव्या पदाधिकाऱ्यांच्या यादीला मंजुरी दिली, ज्यात अॅड. दरेकर यांच्या नावाचा समावेश आहे. या नियुक्तीमुळे पक्षाने एका अनुभवी चेहऱ्यावर मोठी जबाबदारी सोपवली आहे.
अॅड. रवींद्र दरेकर यांचा राजकीय प्रवास हा विद्यार्थी चळवळीतून सुरू झाला. काँग्रेसच्या विद्यार्थी आघाडी असलेल्या एनएसयूआय (NSUI) पासून त्यांनी आपल्या कामाला सुरुवात केली. त्यानंतर युवक काँग्रेसमध्येही त्यांनी विविध महत्त्वाच्या पदांवर उल्लेखनीय कार्य केले. मुख्य प्रवाहात काँग्रेसमध्ये सक्रिय झाल्यानंतर त्यांनी अनेक वर्षे 'प्रदेश सचिव' म्हणून पक्षाची धुरा यशस्वीपणे सांभाळली. त्यांच्या पक्षनिष्ठेची आणि कामाची दखल घेत पक्षश्रेष्ठींनी आता त्यांना बढती देत सरचिटणीसपदाची महत्त्वपूर्ण जबाबदारी दिली आहे.
अॅड. दरेकर यांच्या नियुक्तीचे वृत्त समजताच गडचिरोली जिल्ह्यातील काँग्रेस कार्यकर्त्यांमध्ये उत्साहाचे वातावरण पसरले आहे. आगामी निवडणुकांच्या पार्श्वभूमीवर त्यांच्या अनुभवाचा आणि संघटन कौशल्याचा पक्षाला निश्चितच फायदा होईल, असा विश्वास व्यक्त केला जात आहे. त्यांच्या निवडीबद्दल जिल्ह्यातील काँग्रेस कार्यकर्त्यांनी आणि पदाधिकाऱ्यांनी त्यांचे अभिनंदन केले आहे.