Bhoyegaon Dhanora Iron Slurry Pipeline
चंद्रपूर : एकीकडे शासनाकडून वृक्षलागवड आणि पर्यावरण संवर्धनाचा संदेश दिला जात असताना, दुसरीकडे सात वर्षे संगोपन करून १५ ते २० फूट उंच झालेली शेकडो झाडे काही तासांत जेसीबीच्या सहाय्याने उद्ध्वस्त केल्याचा धक्कादायक प्रकार चंद्रपूर जिल्ह्यात समोर आला आहे. कोणसरी ते घुग्घूस शहरापर्यंत लायड्स मेटल प्रकल्पासाठी आयरन स्लरी वाहून नेण्यासाठी पाइपलाइन टाकण्याचे काम सुरू आहे. याच कामासाठी भोयेगाव ते धानोरा फाटा मार्गावर मोठ्या प्रमाणात खोदकाम करण्यात येत आहे. या खोदकामाच्या मार्गात आलेली झाडे उखडण्यात आल्याचा आरोप होत आहे.
भोयेगाव ते धानोरा फाटा मार्गाच्या दुतर्फा सुमारे सात वर्षांपूर्वी मोठ्या प्रमाणात वृक्षलागवड करण्यात आली होती. या झाडांना टँकरद्वारे नियमित पाणी देत त्यांचे संगोपन करण्यात आले. सात वर्षांच्या मेहनतीनंतर ही झाडे आता १५ ते २० फूट उंच झाली होती. मात्र, आयरन स्लरी पाइपलाइनसाठी सुरू असलेल्या खोदकामामुळे यातील अनेक झाडे जेसीबीच्या सहाय्याने उखडण्यात आल्याचे सांगण्यात येत आहे.
पाइपलाइन टाकताना ही झाडे वाचविण्यासाठी पर्यायी मार्गाचा विचार करण्यात आला होता का, असा प्रश्न उपस्थित होत आहे. तसेच झाडे तोडण्यासाठी अथवा हटविण्यासाठी आवश्यक पर्यावरणीय परवानग्या घेण्यात आल्या आहेत का, याबाबतही नागरिकांकडून माहिती मागितली जात आहे. वर्षानुवर्षे जपलेल्या झाडांचे अशा प्रकारे नुकसान होत असल्याने पर्यावरणप्रेमींमध्ये नाराजी व्यक्त होत आहे.
सदर काम सार्वजनिक बांधकाम विभागाच्या गडचांदूर कार्यालयाच्या हद्दीत सुरू असल्याचे सांगण्यात येत आहे. त्यामुळे संबंधित अधिकारी आणि प्रशासनाला या प्रकाराची माहिती आहे का, झाडे वाचविण्यासाठी कोणत्या उपाययोजना करण्यात आल्या, तसेच झाडे हटविण्यासाठी संबंधित विभागाची परवानगी घेण्यात आली आहे का, याबाबत प्रश्न उपस्थित झाले आहेत. या प्रकरणी संबंधित विभाग आणि प्रशासन नेमकी काय भूमिका घेते, याकडे आता लक्ष लागले आहे.