बुलढाणा : समृद्धी महामार्गावर ट्रक चालकाला झोपेची डुलकी लागल्याने ट्रकने समोरील अज्ञात वाहनाला पाठीमागून जोरदार धडक दिल्याची घटना मंगळवारी (दि.४) पहाटे घडली. या भीषण अपघातात ट्रक चालकाचा जागीच मृत्यू झाला, तर त्याचा सहायक (क्लिनर) किरकोळ जखमी झाला.
पोलिसांनी दिलेल्या माहितीनुसार, ट्रक (क्र. आरजे-जीडी ४४१२) समृद्धी महामार्गावरील चॅनेल क्रमांक २६९.४०० जवळून जात असताना चालक लेकराज याला पहाटे सुमारे ३.५३ वाजता झोपेची डुलकी लागली. त्यामुळे ट्रकवरील नियंत्रण सुटून तो समोरील अज्ञात वाहनावर पाठीमागून धडकला. धडक इतकी जोरदार होती की ट्रकच्या पुढील भागाचे मोठे नुकसान झाले आणि चालकाचा घटनास्थळीच मृत्यू झाला. अपघातात क्लिनर किरकोळ जखमी झाला.
अपघाताची माहिती मिळताच मेहकरजवळील फरदापूर पोलीस चौकीचे पोलीस निरीक्षक सुनील सोळंके, सहायक पोलीस उपनिरीक्षक मंगेश खडसे तसेच पोलीस कर्मचारी निलेश राठोड, धीरज चंदन, मंगेश तंत्रे आणि गजानन जाधव यांनी तातडीने घटनास्थळी धाव घेतली. जखमी क्लिनरला उपचारासाठी स्थानिक रुग्णालयात दाखल करण्यात आले. तसेच अपघातग्रस्त वाहन हटवून समृद्धी महामार्गावरील वाहतूक सुरळीत करण्यात आली.