Manegaon truck bike collision
भंडारा: भरधाव ट्रकने दुचाकीला मागेहून जोरदार धडक दिली. या अपघातात दुचाकीवरील पत्नीचा जागीच मृत्यू झाला, तर पती जखमी झाला. ही घटना राष्ट्रीय महामार्गावरील मानेगाव/सडक येथे आज (दि. १४) दुपारी २ वाजताच्या सुमारास घडली. वैशाली विजय शेंडे (वय ४८, रा. शिवनी मोगरा) असे मृताचे नाव आहे.
वैशाली आणि तिचे पती हे दुचाकीने शिवनी मोगरा येथून लाखनी येथे कामगार विभागाकडून वाटप केल्या जाणाऱ्या पेटीचे फॉर्म भरण्यासाठी जात होते. दरम्यान, मानेगाव/सडक येथील स्नेहा बारसमोर ट्रक (सीजी ०४ एमपी ०७८३) ने भरधाव वेगात येत दुचाकीला मागेहून जोरदार धडक दिली. धडक दिल्यामुळे दुचाकी अनियंत्रित झाली आणि दोघेही पती-पत्नी रस्त्यावर पडले. तेवढ्यात मागेहून येणाऱ्या ट्रकचे चाक वैशाली यांच्या डोक्यावरुन गेल्याने त्यांचा जागीच मृत्यू झाला.
घटनेची माहिती मिळताच लाखनी पोलिसांचा ताफा घटनास्थळी दाखल झाला. बघ्यांचीही गर्दी मोठ्या प्रमाणात जमली होती. या प्रकरणी लाखनी पोलिसांनी ट्रकचालकाविरुद्ध गुन्हा नोंदविला असून अधिक तपास सुरू आहे.