अमरावती : महामार्गावरून गावाला परत जाणार्या युवकांच्या दुचाकीला मागून येणार्या भरधाव वाहनाने धडक दिल्याने अपघात होऊन एक युवक जागीच ठार झाला तर दुसरा युवक गंभीर जखमी आहे. ही घटना सोमवारी (दि.७) रात्री ८ वाजताच्या दरम्यान अमरावती-नागपूर महामार्गावर सावर्डीनजीक रिलायंस पेट्रोल पंपाजवळ घडली.राहुल संजय डिवरे (वय २६, रा. शिवणगाव फत्तेपूर ) असे मृतकाचे तर रोशन गजानन पांडे (वय २५, रा. शिवणगाव फत्तेपूर) असे जखमीचे नाव आहे. घटनेनंतर बराच वेळ वाहतूक ठप्प झाली होती.
सविस्तर वृत्त असे की,राहुल व रोशन हे दोघे सोमवारी रात्री दुचाकीने अमरावतीवरून राष्ट्रीय महामार्गाने गावी शिवणगाव फत्तेपूरला जात होते. सावर्डीजवळ असलेल्या रिलायन्स पेट्रोलपंपाजवळ अचानक मागून आलेल्या भरधाव वाहनाने त्यांच्या दुचाकीला जोरदार धडक दिली. या अपघातात राहुलचा जागीच करुण अंत झाला. तर रोशन जखमी झाला. अपघातानंतर त्यांच्या दुचाकीने पेट घेतला.अपघाताची माहिती मिळताच नांदगाव पेठचे ठाणेदार महेंद्र अंभोरे यांनी आपल्या ताफ्यासह घटनास्थळ गाठून पंचनामा केला व जखमी रोशनला तातडीने उपचारासाठी अमरावती जिल्हा सामान्य रुग्णालयात पाठविले.
अपघातानंतर घटनास्थळी नागरिकांनी गर्दी केली होती. काहींनी बचावकार्य केले. दरम्यान वाहतूक कोंडी झाल्याने बराचवेळ वाहतूक ठप्प झाली होती. नांदगाव पेठ पोलिसांनी तातडीने घटनास्थळ गाठून जखमीला रुग्णालयात पाठवले व वाहतूक सुरळीत केली.या प्रकरणी अज्ञात वाहनचालकाविरुद्ध गुन्हा दाखल करण्यात आला असून त्याचा शोध सुरू आहे.