बाबासाहेबांच्या नावाला विरोध करणाऱ्यांवर गुन्हे दाखल करा : जोगेंद्र कवाडे

अमरावती, पुढारी वृत्तसेवा : बाबासाहेबांच्या नावाला विरोध करणाऱ्यांवर गुन्हे दाखल करण्यात यावे, अशी मागणी पीपल्स रिपब्लिकन पक्षाचे राष्ट्रीय अध्यक्ष जोगेंद्र कवाडे यांनी अमरावती येथे केली आहे. ज्यांनी बाबासाहेबांच्या नावाला विरोध केला त्यांनीच आंदोलनादरम्यान दगडफेक केली असा आरोपही कवाडे यांच्याकडून करण्यात आला.

पांढरी खानमपूर येथील प्रवेशद्वाराच्या कमानीवरून चिघळलेल्या वादानंतर बुधवारी प्रा.कवाडे यांनी अमरावती येथे भेट दिली. त्यानंतर ते प्रसारमाध्यमांशी बोलत होते. प्रवेशद्वाराला डॉ. बाबासाहेब आंबेडकर यांचे नाव असल्याने त्याला विरोध करण्यात आला. ही बाब जातीय मानसिकता दर्शविते आहे. प्रशासनाने सामाजिक सलोखा कायम ठेवण्यासाठी शिवशक्ती भीमशक्ती असे नाव त्या प्रवेशद्वाराला द्यावे अशी सूचना ही त्यांनी केली.

पांढरी खानमपूर येथील प्रवेशद्वारावरून झालेले आंदोलन आणि त्यानंतर पोलिसांनी केलेला लाठी चार्ज पाहता हे प्रकरण प्रशासनाने वेळीच काळजी घेतली असती तर झाले नसते असेही ते म्हणाले. ग्रामपंचायतचा ठराव असताना देखील प्रशासनाच्या दिरंगाईमुळेच ग्रामस्थांना आंदोलन करावे लागले. विभागीय आयुक्त कार्यालयावर आंदोलन शांततेत सुरू असताना काही अवांछणीय राजकीय तत्व आंदोलनात शिरले. त्यामुळे या प्रकरणाची सीआयडीमार्फत चौकशी करून त्यांचा शोध घेण्यात यावा अशी मागणी प्रा. कवाडे यांनी केली आहे. निवडणुकीच्या तोंडावर सामाजिक वातावरण बिघडविण्याचे काम होत आहे. आता पांढरी ग्रामपंचायतने गावात कुठलेही प्रवेशद्वार उभारण्यात येणार नाही, असा ठराव घेऊन डॉ.बाबासाहेब आंबेडकरांचे नाव असलेल्या प्रवेशद्वाराचा पूर्वीचा तो ठराव रद्द केला आहे.भविष्यात ही ग्रामपंचायत एखाद्या समाजाला गावात प्रवेश देऊ नये असाही ठराव घेऊ शकते. त्यामुळे शासन आणि प्रशासनाने ग्रामपंचायतच्या ठरावाच्या मर्यादा निश्चित कराव्या असेही प्रा.जोगेंद्र कवाडे म्हणाले.

तत्पूर्वी प्रा. कवाडे यांनी जिल्हाधिकारी, पोलीस आयुक्त यांची देखील या प्रकरणी भेट घेतली. त्यांच्याकडे योग्य ती चौकशी करून कार्यवाही करण्याची मागणी केली.