अकोला : पोटाची भूक शमवण्यासाठी दुकानासमोर जेवायला बसणे एका व्यक्तीला चांगलेच महागात पडले आहे. "माझ्या दुकानासमोर जेवायला का बसला?" असा जाब विचारत एका किराणा दुकानदाराने एका व्यक्तीला लाथा-बुक्क्यांनी आणि काठीने अमानुष मारहाण केल्याची घटना तेल्हारा तालुक्यातील नेर येथे घडली आहे. या प्रकरणी तेल्हारा पोलिसांनी आरोपी दुकानदाराविरुद्ध गुन्हा दाखल केला आहे.
मिळालेल्या माहितीनुसार, ८ फेब्रुवारी रोजी दुपारी २:३० वाजताच्या सुमारास नेर येथील रहिवासी रामराव शामराव काळणे हे बाळकृष्ण रामकृष्ण म्हस्के यांच्या किराणा दुकानासमोर जेवण करण्यासाठी बसले होते. यावेळी दुकानदार बाळकृष्ण म्हस्के याने जवळ येऊन, "तू माझ्या दुकानासमोर जेवायला का बसला?" असे म्हणत रामराव यांच्याशी हुज्जत घातली.
रागाच्या भरात असलेल्या दुकानदाराने केवळ शब्दांनी न थांबता रामराव काळणे यांना लाथा-बुक्क्यांनी मारहाण करण्यास सुरुवात केली. एवढ्यावरच न थांबता आरोपीने हातातील लाकडी काठीने रामराव यांच्या डोक्यावर आणि कानाच्या मागील भागावर जोरदार प्रहार केला. या हल्ल्यात रामराव यांच्या कानामागून रक्तस्त्राव होऊन ते गंभीर जखमी झाले.
या अनपेक्षित आणि हिंसक हल्ल्यानंतर जखमी रामराव काळणे यांनी तातडीने तेल्हारा पोलीस स्टेशन गाठून तक्रार नोंदवली. त्यांच्या तक्रारीवरून पोलिसांनी आरोपी बाळकृष्ण म्हस्के याच्याविरुद्ध विविध कलमान्वये गुन्हा दाखल केला आहे. एकीकडे माणुसकीच्या गप्पा मारल्या जात असताना, केवळ दुकानासमोर जेवायला बसले म्हणून झालेल्या या मारहाणीमुळे परिसरात संताप व्यक्त केला जात आहे. पोलीस या प्रकरणाचा पुढील तपास करत आहेत.