उल्हासनगर : उल्हासनगर गुन्हे शाखेच्या घटक 4 ने अंबरनाथ येथे केलेल्या कारवाईत तब्बल 14 लाख रुपयांचे एम.डी. (मेफेड्रॉन) हा अंमली पदार्थ जप्त केला आहे. या प्रकरणी एका महिलेसह दोघांना अटक करण्यात आली असून पुढील तपास सुरू आहे.
मिळालेल्या माहितीनुसार सोमवारी दुपारी 4 वाजताच्या सुमारास गुन्हे शाखा घटक ४ चे पोलीस हवालदार राजेंद्र रघुनाथ थोरवे यांना नेवाळी चौकाकडून कटईकडे जाणाऱ्या रस्त्यावर एका महिलेकडे मोठ्या प्रमाणात अंमली पदार्थ असल्याची माहिती मिळाली होती. या माहितीच्या आधारे वरिष्ठ पोलिस निरीक्षक योगेश आव्हाड यांच्या मार्गदर्शनाखाली पोलिसांनी बंद पडलेल्या देवांश ढाब्यासमोर सापळा रचला.
या सापळ्यात नौशिन मैनुद्दीन शेख या महिलेला पोलिसांनी ताब्यात घेतले. तिच्याकडे केलेल्या तपासणीत ७१.०३ ग्रॅम एम.डी.(मेफेड्रॉन) हा अंमली पदार्थ बेकायदेशीररित्या विक्री करण्याच्या उद्देशाने ठेवलेला आढळला. या जप्त केलेल्या अंमली पदार्थांची एकूण किंमत 14 लाख 31 हजार रुपये आहे.