ठाणे : भ्रष्टाचाराने पोखरलेल्या ठाणे महापालिकेत पुन्हा एकदा मोठा टेंडर घोटाळा समोर आला आहे. पात्र असलेल्या कंपन्यांना डावलून पात्र नसलेल्या मर्जीतल्या कंपनीला तब्बल 22कोटींचे काम देण्यात आले होते. संबंधित कंपनीला हे काम मिळावे, यासाठी पालिकेवर राजकीय दबाव असल्याची चर्चा पालिका वर्तुळात सुरु आहे. ठाणे पालिकेचे उपअभियंता गुणवंत झांबरे यांनी नियम डावलून संबंधित कंपनीला काम दिल्याचा आरोप झांबरे यांच्यावर करण्यात आला आहे. तर पालिका तसेच लाचलुचपत विभागाच्या स्तरावर कोणत्याच प्रकारची कारवाई करण्यात आली नसल्याने अखेर तक्रारदार अशोक सोनावले यांनी ठाणे न्यायालयात धाव घेतली आहे.
ठाणे महापालिकेच्या वतीने कोलशेत, माजिवडा आणि विटावा या मलप्रक्रिया केंद्रासाठी परिचलन निघा, देखभाल आणि दुरुस्तीसाठी ही निविदा प्रक्रिया राबवण्यात आली. तब्बल 22 कोटींचे हे काम होते. यासाठी काही कंपन्यांनी निविदा अर्ज देखील भरला होता. यामध्ये तोशिबा आणि एस.एस इन्फ्रा यांच्यासह अन्य तीन कंपन्या या कामासाठी पात्र देखील ठरल्या होत्या आणि त्यांचा अनुभव सुद्धा होता. मात्र असे असताना या कंपन्यांना डावलून अनुभव नसलेल्या आणि पात्र नसलेल्या मे.ए.के.इलेक्ट्रिकल अँड वर्क्स प्रा.लि या मर्जीतल्या कंपनीला हे काम देण्यात आले आहे.
विशेष म्हणजे निविदा मागवताना वैयक्तिक निविदा मागवण्यात आल्या असताना हे काम मिळवण्यासाठी दुसऱ्या कंपनीसोबत जॉईंट व्हेंचर दाखवून निविदा भरली. आणि ठाणे महापालिकेनेही नियम डावलून या कंपनीला हे काम दिले असल्याचे आरोप तक्रारदार अशोक सोनावले यांनी केला आहे.
सुरुवातीला पालिका आयुक्तांकडे तक्रार करूनही ज्यांच्यावर आरोप करण्यात आला आहे त्या उप अभियंता झांबरे यांच्याकडेच तक्रार सुपूर्द करण्यात आली. यामध्ये ऑडिट विभागाने देखील ताशेरे ओढले आहेत.मात्र एवढे होऊनही पालिका स्तरावर काहीच हालचाल झाली नाही. अखेर या प्रकरणाच्या विरोधात सुरुवातीला आर्थिक गुन्हे शाखेकडे तक्रार करण्यात आली होती. मात्र आर्थिक गुन्हे शाखेने हे प्रकरण लाचलुचपत विभागाकडे वर्ग केले असून लाचलुचपत विभागाच्या वतीने अद्याप कोणत्याच प्रकारची हालचाली झालेल्या नाहीत.
या प्रकरणात आता तक्रादार अशोक सोनावले यांनी न्यायालयात धाव घेतली आहे. पालिका स्तरावर तसेच लाचलुचपत विभागाच्या स्तरावर या प्रकरणात कोणत्याच प्रकारची कारवाई होत नसल्याने त्यांनी ठाणे न्यायालयात धाव घेतली आहे. या प्रकरणामुळे पुन्हा एकदा ठाणे पालिकेच्या अधिकाऱ्यांच्या कारभारावर प्रश्नचिन्ह निर्माण झाले आहे.
असा झाला निविदा घोटाळा?
12 मार्च 2025 रोजी आयुक्तांकडे तक्रार
ज्या अभियंत्यावर आरोप करण्यात आले त्याच अभियंत्याकडे तक्रार वर्ग करण्यात आली.
नियम डावलून राजकीय दबावापोटी पात्र नसलेल्या कंपनीला उपअभियंता झांबरे यांच्याकडू काम देण्यात आले.
नियमात नसताना जॉईंट व्हेंचरने निविदा स्वीकारून दुसऱ्या कंपनीच्या अनुभच्या प्रमाणपत्रावर मे.ए.के. इलेक्ट्रिकल अँड वर्क्स प्रा.लि या कंपनीला बेकायदेशीर काम देण्यात आले.