खडवली : ऑनलाईन रमी खेळण्याच्या व्यसनामुळे कर्जबाजारी झालेल्या एका तरुणाने धावत्या लोकल ट्रेनमध्ये महिला प्रवाशांचे दागिने लुटण्यास सुरुवात केल्याची धक्कादायक घटना समोर आली आहे. ऋषिकेश बेनके (35, रा.खर्डी) असे या तरुणाचे नाव असून, कल्याण जीआरपी पोलिसांनी त्याला बेड्या ठोकल्या आहेत. पावसाळ्यात रसवंती गृहाचे दुकान बंद झाल्याने आणि जुगाराच्या व्यसनामुळे तो आर्थिक संकटात सापडला होता.
गेल्या काही दिवसांपासून कल्याण-कसारा स्टेशन दरम्यान धावत्या लोकल ट्रेनमधून महिला प्रवाशांचे महागडे दागिने हिसकावून चोरटा पळून जात असल्याची रेल्वे पोलिसांची डोकेदुखी वाढली होती. विशेषतः खर्डी आणि कसारा रेल्वे स्टेशन दरम्यान अशा अनेक घटना घडल्या होत्या. चोरटा लोकल ट्रेनच्या उलट्या दिशेने उडी मारून पळ काढत असल्याने त्याला पकडणे पोलिसांसाठी आव्हान बनले होते.
कल्याण जीआरपीचे वरिष्ठ पोलिस निरीक्षक पंढरीनाथ कांदे यांनी या चोरट्याला शोधण्यासाठी दोन तपास पथके नेमली. तपासादरम्यान, पोलिसांना चोरटा लोकलट्रेनमधून उडी मारून पळ काढत असतानाचे सीसीटीव्ही फुटेज मिळाले. या फुटेजच्या आधारे आणि गुप्त माहितीच्या बळावर, हा चोरटा खर्डी येथीलच असल्याची माहिती पोलिसांना मिळाली. त्यानुसार, पोलिस पथक खर्डी येथे ऋषिकेशच्या घरी पोहोचले. सीसीटीव्ही फुटेजमधील तरुण हा ऋषिकेश बेनकेच असल्याचे निष्पन्न झाले.
पोलिसांनी त्याला तात्काळ ताब्यात घेतले.यानंतर पोलिसांनी चौकशी केली. या चौकशीत ऋषिकेशने धक्कादायक माहिती दिली. तो खर्डीमध्ये रसवंती गृह चालवतो. मात्र, पावसाळा सुरू झाल्याने त्याचे दुकान बंद झाले. याच काळात त्याला ऑनलाईन रमी खेळण्याचा नाद लागला. ज्यामुळे तो प्रचंड कर्जबाजारी झाला.
एकीकडे उत्पन्नाचे साधन बंद झाले होते. तर दुसरीकडे जुगारात पैसे गमावल्याने कुटुंबाचा उदरनिर्वाह कसा करायचा, या चिंतेतून त्याने चोरीचा मार्ग निवडला, अशी माहिती त्याने पोलिसांना दिली. कल्याण जीआरपी पोलिस ऋषिकेशने आणखी काही गुन्हे केले आहेत का, याचा तपास करत आहेत. त्याच्या अटकेने कल्याण-कसारा मार्गावरील महिला प्रवाशांनी सुटकेचा निश्वास टाकला आहे.