डोंबिवली : सार्वजनिक स्वच्छतागृहांसह लोकल डब्यांमध्ये भोंदू बाबांनी पुन्हा डोके वर काढले आहे. मध्य रेल्वेत बंगाली बाबा, तसेच पश्चिम रेल्वेच्या महिला डब्यांमध्येही या बंगाली बाबांच्या नावांची चर्चा सुरू आहे. जागोजागी पोस्टर्स चिटकवून अंधश्रद्धेचा फैलाव करणार्या अशा जाहिरातदारांवर कुणाचाही वचक राहिलेला दिसून येत नाही. रेल्वे प्रशासन, सुरक्षा बल आणि लोहमार्ग पोलीस अशा बाबांच्या गोरखधंद्यांपासून अनभिज्ञ असल्याचे दिसून येते.
शादीमें रूकावट, प्यार में धोखा, पती-पत्नीमें अनबन, गृह क्लेश, तलाक जैसी समस्याओं का समाधान... एक बार जरूर कॉल करें असे आवाहन करणारी पोस्टर्स खास करून रेल्वेच्या महिलांच्या डब्यांत आढळून येत आहेत.
पूर्वी लोकल डब्यांतून बाबा, तांत्रिक, अशा जाहिराती विपुल प्रमाणात चिटकवेल्या दिसत असत. अर्थात आताही अनेक ठिकाणी दिसत आहेत. अशा जाहिरातींचे पोस्टर्स या बाबांचे हस्तक लोकलच्या महिला डब्यांमध्ये घुसून कुठे आणि कधी चिटकवतात? हा देखील संशोधनाचा विषय आहे. बहुदा लोकल गाड्या कारशेडला लागतात, तेव्हा हे बाबांचे हस्तक डब्यांमध्ये घुसून आपला कार्यभाग साधत असावेत, असा कयास आहे.
प्रेमात सफलता, वशीकरण असे उल्लेख असलेल्या जाहिरातींना भुलून आपल्या आवडत्या व्यक्तीने आपल्याला होकार द्यावा किंवा एखादी व्यक्ति आपल्याला वश व्हावी या उद्देशाने अनेक जण जाहिराती वाचून बाबांनी सांगितलेल्या ठिकाणी गेले. बाबांनी कुणाचे भले केल्याचे ऐकिवात नाही, उलट त्यांच्याकडे जाणार्यांची लूट झाली. अशा भोंदू बाबांकडे जाऊन फायदा होण्याऐवजी फसगत झालेल्या अनेकांच्या तक्रारी आहेत.
महिला आणि तरुणींना तर अशा ठिकाणी
इतरही धोके असतात. एकदा मनात एखादी बाब अथवा ‘टार्गेट’ रूतून बसले की इतर काही सुचत नाही. झपाटलेल्या अवस्थेत कोणत्याही थराला माणूस जाऊ शकतो. एक गोष्ट नक्की की आपण ज्या व्यक्तीवर प्रेम करतो त्या व्यक्तीचे आपल्यावर प्रेम असेलच असे नाही, किंबहुना अशी जबरदस्ती करणे अयोग्य आहेच. त्याच्या या मानसिकतेचा फायदा घेऊन अनेक भोंदू बाबा पैसे उकळत असतील, याकडे तज्ज्ञांनी त्यांचे मत व्यक्त केले.
दरम्यान करणी, भानामती, भूत-प्रेतबाधेसारख्या विविध समस्यांपासून सुटका करण्याची हे बाबा खात्री देतात. एकदा कॉल करा, तुमचे जीवनमान बदलून जाईल, असे आवाहन करणार्या या बाबांकडे जाऊन आलेल्यांना कितपत फायदा झाला? हे छातीठोकपणे सांगणारा अद्याप एकही पुढे आल्याचे ऐकिवात नाही.
गाव-खेड्यांतील लोण लोकलमध्ये घुसले
काही भागात अजूनही भुता-खेतांचा वावर असतो, असे मानले जात असेल तरी अशा खुळचट कल्पनांना छेद देण्यासाठी, तसेच ग्रामीण भागातील विद्यार्थ्यांपर्यंत विज्ञान दिवसाचे महत्व पोहोचावे, या उद्देशाने महाराष्ट्र अंधश्रद्धा निर्मूलन समितीतर्फे प्रयत्न केले जातात. तरीही ग्रामीण परिसरातील वस्त्यांत आजही अंधश्रद्धा ठासून भरल्याचे दिसून येते.
गाव-खेड्यांतील हे लोण आता शहरी भागातून मुंबईची जीवनवाहिनी असलेल्या लोकलमध्येही घुसल्याचे या बाबांनी लावलेल्या पोस्टर्सवरून दिसून येते.