डोंबिवली : कल्याण पश्चिमेतील घोलप नगर परिसरात री-डेव्हलपमेंटसाठी पाडकाम सुरू असताना 'विनायक दर्शन' ही इमारत रविवारी दुपारी अचानक कोसळली. या घटनेचा थरारक व्हिडिओ सोशल मीडियावर मोठ्या प्रमाणात व्हायरल झाला आहे. सुदैवाने इमारत आधीच पूर्णपणे रिकामी करण्यात आली असल्याने कोणतीही जीवितहानी झाली नाही.
रविवारी दुपारी सुमारे २ वाजण्याच्या सुमारास ही घटना घडली. पाडकाम सुरू असतानाच इमारतीचा मोठा भाग अचानक कोसळला. मोठ्या आवाजासह इमारत जमीनदोस्त होताच परिसरात धूळ आणि धुराचे प्रचंड लोट पसरले. इमारत कोसळताना शेजारील लो-टेन्शन वीज खांबही पडला, त्यामुळे परिसरातील वीजपुरवठा काही काळासाठी खंडित झाला.
घटनेनंतर स्थानिक रहिवाशांनी तीव्र संताप व्यक्त करत पाडकामाच्या ठिकाणी आवश्यक सुरक्षा उपाययोजना करण्यात आल्या नव्हत्या, असा आरोप केला. संरक्षणात्मक जाळी, बॅरिकेड्स तसेच धूळ नियंत्रणासाठी पाण्याची फवारणी यांसारख्या मूलभूत उपायांकडे दुर्लक्ष करण्यात आल्याचे त्यांनी सांगितले. रहिवाशांच्या मते, ही घटना दिवसाढवळ्या घडली. इमारत रिकामी नसती, तर मोठी जीवितहानी झाली असती. संबंधित ठेकेदार आणि जबाबदार अधिकाऱ्यांवर कठोर कारवाई करण्याची मागणी त्यांनी केली आहे.
घटनेची माहिती मिळताच कल्याण-डोंबिवली महानगरपालिकेचे (केडीएमसी) अधिकारी आणि अग्निशमन दलाचे जवान घटनास्थळी दाखल झाले. ढिगारा हटविण्याचे काम हाती घेण्यात आले असून, पाडकामासाठी आवश्यक परवानग्या घेण्यात आल्या होत्या का, तसेच सुरक्षा नियमांचे पालन करण्यात आले होते का, याची तांत्रिक तपासणी महापालिकेकडून सुरू करण्यात आली आहे.
कल्याण-डोंबिवली परिसरात गेल्या काही वर्षांत री-डेव्हलपमेंट प्रकल्पांची संख्या मोठ्या प्रमाणात वाढली आहे. मात्र, पाडकाम आणि बांधकामादरम्यान सुरक्षा नियमांकडे दुर्लक्ष होत असल्याच्या तक्रारी सातत्याने समोर येत आहेत. रविवारी घडलेल्या या घटनेमुळे री-डेव्हलपमेंट प्रकल्पांतील सुरक्षिततेचा मुद्दा पुन्हा एकदा ऐरणीवर आला आहे. दरम्यान, पोलिस आणि महापालिका प्रशासनाने घटनास्थळाचा पंचनामा करून पुढील कायदेशीर प्रक्रियेला सुरुवात केली आहे.