डोंबिवली : कल्याण पश्चिमेकडे असलेल्या गांधारी रोड परिसरात एका फर्निचरच्या दुकानात गुरुवारी मध्यरात्रीच्या सुमारास भला मोठा अजगर शिरल्याची घटना घडली. अचानक समोर आलेल्या या अजस्त्र अजगरामुळे व्यापाऱ्यांची मोठी तारांबळ उडाली होती. मात्र प्राणीमित्रांच्या समयसूचकतेमुळे या अजगराला कोणतीही इजा न होता सुरक्षितरीत्या रेस्क्यू करण्यात आले आहे.
गांधारी रोडला असलेल्या एका फर्निचरच्या दुकानात रात्री दोन वाजण्याच्या सुमारास तेथे उपस्थित असलेल्या लोकांना अचानक एक मोठा अजगर आढळला. अजस्त्र अजगर पाहून तेथील व्यापाऱ्यांना अक्षरशः घाम फुटला.
दुकानातील सामानाचा आडोसा घेत हा अजगर आत शिरल्याने त्याला पकडण्याचे मोठे आव्हान होते. रहिवाशांनी तातडीने वॉर फाऊंडेशनचे प्राणी मित्र प्रेम आहेर यांच्याशी संपर्क साधला असता, या प्राणी मित्रांनी अत्यंत शिताफीने या अजगराचा बचाव केला.
वनविभागाच्या सूचना आणि मार्गदर्शनाखाली लवकरच त्याला सुरक्षित नैसर्गिक अधिवासात सोडण्यात येणार असल्याची माहिती प्रेम आहेर यांनी दिली.