डोंबिवली : कल्याण-डोंबिवली महानगरपालिकेच्या सार्वत्रिक निवडणुका तोंडावर असतानाची याद्यांच्या घोळ अद्याप कायम असल्याचे पश्चिम डोंबिवलीतील प्रभाग २१ च्या यादीतून दिसून येते. या प्रभागातील तब्बल ४७ इमारतींतील मतदारांची नावे यादीतून गायब असून स्थानिक निवडणूक अधिकाऱ्यांनी या गंभीर प्रकाराची दखल घेऊन सदर मतदारांची नावे यादीत समाविष्ट करावीत, याकडे केडीएमटीचे माजी सदस्य तथा मनसेचे डोंबिवली विधानसभा क्षेत्र अध्यक्ष प्रल्हाद म्हात्रे यांनी निवेदनाद्वारे लक्ष वेधले आहे.
या संदर्भात १४३ डोंबिवली विधानसभा क्षेत्रातील कल्याण-डोंबिवली महानगरपालिकेच्या प्रभाग क्रमांक २१/ह चे अधिकारी तथा निवडणूक नोंदणी अधिकाऱ्यांकडे प्रल्हाद म्हात्रे यांनी ४७ इमारतींची यादीच सादर केली आहे. १४३ डोंबिवली विधानसभा क्षेत्रातील प्रभाग क्रमांक २१ मध्ये असलेल्या मतदार यादीत इमारतींच्या नावांसह सदर इमारतींमध्ये राहणाऱ्या रहिवाशांची नावे मतदार यादीत समाविष्ट करण्याची मागणी करण्यात आली आहे. या संदर्भात प्रल्हाद म्हात्रे यांनी सोसायट्या, चाळी आणि इमारतींची यादीच निवेदनाच्या सोबत जोडली आहे.
यादी क्रमांक १७६ : नव राजाराम सोसायटी, दीपल सोसायटी, इशा सोसायटी, कैलास ज्योती (ए आणि बी विंग), धर्मा निवास, वेणू स्मृती, अश्विनी निवास, डोंबिवली नागरिक (ए, बी, सी आणि डी विंग), डोंबिवली पिपल्स, एलोरा कॉम्प्लेक्स, ओम गंगाई बिल्डिंग, डोंबिवली रहिवाशी (१-२-३-४), विष्णू भुवन, आई निवास, सुनिल निवास (ए, बी आणि सी विंग), देवचंद सोसायटी, निळकंठ, जानकी निवास, साईकृपा बिल्डिंग, सुरज बिल्डिंग, भागीरथी (१-२-३), चंद्राबाई भुवन, नारायण निवास, साईधाम बिल्डिंग, राधा बिल्डिंग, साई निवास बिल्डिंग, जीवनप्रित बिल्डिंग, मुखर्जी बिल्डिंग, कैलास दर्शन (ए आणि बी विंग), आनंदी भुवन, सप्तशृंगी आणि साई सेवा बिल्डिंग
यादी क्रमांक ८० : अक्षय सोसायटी, गंगोत्री, आर्य दर्शन, गोविंद सोसायटी आणि पपली सोसायटी
यादी क्रमांक ८१ : सत्यम निवास, शिवम सोसायटी, गजानन श्रद्धा, रविप्रकाश, यमुना छाया, शिवस्मृती, नंदादीप, आर्य कृपा, नीलकंठ छाया आणि कैलास दर्शन
मतदार यादी क्रमांक १७६, यादी क्रमांक ८० आणि यादी क्रमांक ८१ या तीन याद्यांमधील अनेक इमारती प्रभाग क्रमांक २१ च्या सीमा हद्दीमध्ये असून त्यामध्ये अनेक इमारती आहेत. सदर याद्यांचा क्रमांक प्रारूप मतदार यादीमध्ये समाविष्ट करण्यात आला नाही. संबंधित इमारतींतील पात्र मतदारांची नावे अंतिम मतदार याद्यांमध्ये समाविष्ट न केल्यास आगामी काळात होणाऱ्या निवडणुकीपासून त्यांचा मताचा अधिकार बाधित होऊ शकतो. याची दखल घेऊन इमारती/चाळी/सोसायट्यांची नावे प्रभागाच्या मतदार यादीत समाविष्ट करण्यात यावीत. योग्य त्या तपासणीनंतर पात्र रहिवाशांची अर्थात मतदारांची नावे यादीत नोंदविण्यासाठी आवश्यक ती कार्यवाही करण्यात यावी, अशी मागणी प्रल्हाद म्हात्रे यांनी केली आहे. आता कल्याण-डोंबिवली महानगरपालिकेच्या प्रभाग क्रमांक २१/ ह चे प्रधिकृत अधिकारी तथा निवडणूक नोंदणी अधिकारी काय कार्यवाही करतात? याकडे प्रभाग २१ मधील ४७ इमारतींतील मतदारांच्या नजरा लागल्या आहेत.