Thane Fire News | वाड्यातील चार दुकाने जळून खाक; शहरातील अग्निशमन यंत्रणा धूळखात

वाडा : वाडा शहरातील मुख्य रस्त्याच्या कडेला असलेल्या चार दुकानांना रविवार (दि.२१) रोजी सकाळी साडेसातच्या सुमारास आग लागली. हॉटेल, हार्डवेअर, कपडे व भांड्यांच्या दुकानाचे गोदाम अशा दुकानांचा यात समवेश आहे. वाडा नगरपंचायत कडे अग्निशमक यंत्रणा असूनही ती तांत्रिक कारणामुळे धुळखात पडल्याने लोकांनी संताप व्यक्त केला आहे.

सकाळी सुरुवातीला एका दुकानात आग लागली मात्र बघता बघता यात चारही दुकाने आगीच्या भक्ष्यस्थानी सापडली. आगीचे कारण शॉकसर्किट असल्याचे सांगण्यात येत असले तरी यात व्यवसायिकांचे मात्र आतोनात नुकसान झाले आहे. वाडा ही मोठी औद्योगिक वसाहत असूनही या ठिकाणी कोणतीही अग्निशमन यंत्रणा कार्यान्वित नाही ही खेदाची बाब आहे. वाडा नगरपंचायतीकडे अग्निशमन यंत्रणा उभी आहे मात्र तज्ज्ञ कर्मचार्‍यांच्या अभावी ती धुळखात पडली आहे.

आगीच्या घटना घडतात, लोकांचे आतोनात नुकसान होते, रहिवाशी भीतीच्या छायेत राहतात, कारखाने व व्यावसायिक बरबाद होतात मात्र याचे सरकारला काही घेणदेण नाही का अशा शब्दात लोकांनी संताप व्यक्त केला आहे. दरम्यान आग लागल्याच्या दोन तासानंतर पालघर व जव्हार नगर परिषदेच्या अग्निशामक दलाच्या गाड्या घटनास्थळी दाखल झाल्याने उर्वरित आगीवर पूर्ण नियंत्रण मिळवण्यात यश आले आहे. बघ्यांची गर्दी कामात अडथळा निर्माण करीत असली तरी कौतुकास्पद म्हणजे या सर्व घटनेदरम्यान वाडा शहरातील स्थानिक नागरिकांनी आग विझवण्यात मोठा सहभाग दर्शविला.