तलासरी : डहाणू, तलासरी तालुक्यातील परिसर गळवारी (दि.15) पुन्हा भूकंपाने हादरला आहे. येथील परिसरातील गावांना भूकंपाचा धक्का बसला असून या भूकंपाची 3.5 रिश्टर स्केल अशी नोंद करण्यात आली आहे.
तलासरी-डहाणू तालुक्यातील काही गावांना मंगळवारी दुपारी 4 वाजून 47 मिनिटाने 3.5 रिश्टर स्केलचा भूकंपाचा धक्का बसला. त्याचा केंद्रबिंदू जमिनीखाली 5 किमी खोल, डहाणू तालुक्यातील कंक्राटीजवळ असल्याचे सांगण्यात आले आहे. 2018 पासून पालघर जिल्ह्यातील डहाणू, तलासरी तालुक्यातील गावांना भूकंपाचे धक्के बसत आहेत.
गेल्या काही महिन्यांपासून भूकंप थांबले होते. मात्र मंगळवारी (दि.15) दुपारी 4 वाजून 47 मिनिटे 29 सेकंदाला भूकंपाचा सौम्य धक्का बसला. रिश्टर स्केल व त्यांची नोंद 3.5 अशी करण्यात आली. गेल्या काही दिवसांपासून भूकंप थांबले होते. मात्र मंगळवारी पुन्हा तलासरी व डहाणू तालुक्यातील गावे हादरली. दुपारी भूकंपाचा धक्का बसल्याने नागरिक घाबरून घराबाहेर पडले. भूकंपाच्या केंद्रबिंदूत वारंवार बदल होत असून मंगळवारी दुपारी झालेल्या भूकंपाचा केंद्रबिंदू डहाणूतील कंक्राटीजवळ असल्याचे सांगण्यात आले. पाच किमी खोल जमिनीत भूकंप झाल्याची नोंद करण्यात आली आहे. मंगळवारी (दि.15) दुपारी भूकंपाचा धक्का डहाणू, तलासरी आणि गुजरात राज्यातील उंबरगाव तसेच दादरा नगर हवेलीतील सेलवासा, खानवेळपर्यंत बसला. सुदैैवाने यावेळी कोणतीही जीवितहानी झालेली नाही.
तालुक्यात पाच दिवसांपासून मुसळधार पाऊस कोसळत आहे. आणि त्यात भूकंपाने जमीन हादरल्याने नागरिकांना भूकंपाची भीती वाटत असूनही घराबाहेरही झोपता येत नाही. अशा परिस्थितीमध्ये नागरिकांना भीतीच्या सावटाखाली दिवस काढावे लागत असल्याचे दिसून येत आहे.