डोंबिवली : पुढारी वृत्तसेवा
डोंबिवलीचे प्रवेशद्वार म्हणून ओळखल्या जाणाऱ्या घर्डा सर्कल येथे खासदार डॉ. श्रीकांत शिंदे यांच्या संकल्पनेतून हिंदवी स्वराज्य संस्थापक छत्रपती शिवाजी महाराजांचा अश्वारूढ पुतळा उभारण्यात आला आहे. या पुतळ्याचा अनावरण सोहळा सोमवारी रात्री हजारो शिवभक्तांच्या साक्षीने मोठ्या उत्साहात पार पडला. राज्याचे उपमुख्यमंत्री एकनाथ शिंदे यांच्या हस्ते या भव्य आणि सुंदर अशा शिल्पाचे अनावरण करण्यात आले.
सांस्कृतिक नगरी म्हणून ओळख असलेल्या डोंबिवलीतील घर्डा सर्कल यापुढे छत्रपती शिवाजी महाराज चौक या नावाने ओळखला जाणार असल्याची घोषणा उपमुख्यमंत्री एकनाथ शिंदे यांनी यावेळी बोलताना केली.
छत्रपती शिवाजी महाराजांच्या अश्वारुढ पुतळ्याचे अनावरण डोंबिवलीचे प्रवेशद्वार म्हणून ओळखल्या जाणाऱ्या घर्डा सर्कल येथे उपमुख्यमंत्री एकनाथ शिंदे यांच्या हस्ते अनावरण करण्यात आले. या सोहळ्याला भाजपाचे प्रदेश कार्याध्यक्ष तथा डोंबिवलीचे आमदार रविंद्र चव्हाण हे मुंबईतील भाजपाच्या बैठकीला उपस्थित राहणार असल्याचे कारण देत अनुपस्थित होते. या चौकाचे छत्रपती शिवाजी महाराज चौक असे नामकरण करण्यात यावे, याकडे आमदार चव्हाण यांनी कल्याण-डोंबिवली महानगरपालिकेच्या आयुक्त डॉ. इंदूराणी जाखड यांचे पत्राद्वारे लक्ष वेधले होते. आमदार चव्हाण यांच्या मागणीची पूर्तता सोमवारी शिवजयंतीच्या निमित्ताने आयोजित केलेल्या छत्रपती शिवरायांच्या अश्वारुढ पुतळ्याच्या अनावरण प्रसंगी राज्याचे उपमुख्यमंत्री एकनाथ शिंदे यांनी केली. या चौकाला छत्रपती शिवाजी महाराज चौक या नावाने नवी ओळख दिल्याचे उपमुख्यमंत्री शिंदे यांनी जाहीर केले.