डोंबिवली : डोंबिवलीतून एक अत्यंत दःखद घटना समोर आली आहे. डोंबिवलीत वास्तव्यास असलेले सीआयएसएफचे जवान बसंत सिंग यांचा प्रशिक्षणादरम्यान हृदयविकाराच्या झटक्याने मृत्यू झाला. ही घटना हैदराबाद येथे घडली. देशसेवेत असताना त्यांचा आकास्मक मृत्यू झाला. त्यांच्या आकस्मिक निधनाने पश्चिम डोंबिवलीतील गरीबाचा वाडा परिसरामध्ये हळहळ व्यक्त करण्यात येत आहे.
सीआयएसएफ अर्थात सेंट्रल इंडस्ट्रियल सिक्युरिटी फोर्स हे भारत सरकारच्या गृह मंत्रालयाच्या अंतर्गत केंद्रीय सशस्त्र पोलिस बल आहे, जे देशाच्या महत्वपूर्ण उद्योग, सरकारी भवन आणि अन्य संवेदनशील स्थानांची सुरक्षा करते. सीआयएसएफचे मुख्यालय दिल्लीमध्ये आहे. त्यांचे जवान देशभरात तैनात आहेत. याच सीआयएसएफसाठी निवड झालेले बसंत सिंग हे पश्चिम डोंबिवलीतील गरीबाचा वाडा परिसरात राहत होते. ते सीआयएसएफच्या प्रशिक्षणासाठी हैदराबाद येथे गेले होते. प्रशिक्षणादरम्यान अचानक त्यांना हृदयविकाराचा तीव्र झटका आला. तातडीने वैद्यकीय मदत करण्यात आली. मात्र उपचारांदरम्यान त्यांचे निधन झाले.
त्यांचे पार्थिव सोमवारी हैदराबादहून डोंबिवलीत आणण्यात आले. यावेळी परिसरातील रहिवाशांनी मोठी गर्दी केली होती. शासकीय इतमामात त्यांच्या पार्थिवावर अंत्यसंस्कार करण्यात आले. यावेळी शासकीय अधिकाऱ्यांसह स्थानिक रहिवासी, तसेच कुटुंबीय आणि नातेवाईक मोठ्या संख्येने उपस्थित होते. देशसेवेत कार्यरत असलेल्या जवानाला अखेरचा निरोप देताना वातावरण भावूक झाले होते. बसंत सिंग यांच्या पश्चात पत्नी, आई-वडील आणि दोन मुले असा परिवार आहे. सिंग कुटुंबीयांवर दुःखाचा डोंगर कोसळला आहे. त्यांच्या जाण्याने ते राहत असलेल्या परिसरात शोककळा पसरली आहे. देशसेवेसाठी योगदान देणाऱ्या या जवानाला सर्व स्तरांतून श्रद्धांजली वाहण्यात येत आहे.