ठाणे :वर्गणी देण्यास नकार देणाऱ्या मूळच्या बीडच्या अशोक बाजीराव डुमरे (55) यांच्यावर कटारसारख्या धारदार शस्त्राने दिवा स्थानकात हल्ला करण्यात आल्याची घटना 2 फेब्रुवारी, 2026 रोजी सकाळी 9 वाजण्याच्या सुमारास घडली. या प्रकरणी ठाणे लोहमार्ग पोलीसानी आरोपी बबलू याला सापळा रचून दिवा परिसरातून अटक केली.
ठाणे लोहमार्ग पोलिसांनी अटक केलेल्या बबलू याच्या विरोधात ठाणे लोहमार्ग पोलीस ठाण्यात भारतीय न्याय संहिता कलम 118 (1), 352 अंतर्गत गुन्हा दाखल करण्यात आला आहे. या प्रकरणात हल्लेखोराला अटक करून त्याच्याकडून लोखंडी ब्लेड असलेला हिरव्या रंगाचा प्लास्टिक कव्हरयुक्त कटर जप्त करण्यात आला आहे.
वरिष्ठांच्या मार्गदर्शनाखाली सहाय्यक पोलीस निरीक्षक देशमुख, पोलिस हवालदार सुतार, पोलीस शिपाई केदार, बैनाडे व महाजन यांनी डी. बी. पथकाच्या मदतीने सापळा रचत हल्लेखोराला दिवा रेल्वे स्थानक परिसरातून ताब्यात घेतले. त्यानंतर त्यास ठाणे रेल्वे पोलीस ठाण्यात आणून 2 फेब्रुवारी रोजी रात्री अटक केली. पुढील तपास वरिष्ठ पोलीस निरीक्षक अर्चना दुसाने यांच्या मार्गदर्शनाखाली पोलीस हवालदार एस. एच. सुतार करत आहेत.