राजेश जागरे
शहापूर: उताराचा रस्ता... बसमध्ये तब्बल ३० प्रवासी... अचानक ब्रेकने साथ सोडली आणि काही क्षणांतच बसवरील चालकाचा ताबा सुटला! समोर दरी व बस वेगाने पुढे जात असल्याने प्रवाशांच्या काळजाचा ठोका चुकला.
मात्र चालक अनिल साबळे यांनी क्षणाचाही विलंब न करता बस उजव्या बाजूला वळवली. बस संरक्षक भिंतीवर आदळून थांबली व मोठी दुर्घटना थोडक्यात टळली.
या अपघातात ११ प्रवासी जखमी झाले असून त्यांच्यावर शहापूर उपजिल्हा रुग्णालयात उपचार सुरू आहेत. एकाची प्रकृती बिघडल्याने त्याला ठाणे सिव्हिल रुग्णालयात हलविण्यात आल्याची माहिती आहे.
शहापूर तालुक्यातील कोठारे गावाजवळ सोमवारी हा थरारक अपघात घडला. कोठारे येथून ३० प्रवाशांना घेऊन शहापूरच्या दिशेने शहापूर आगाराची एसटी बस निघाली होती. बस उतारावर असताना अचानक ब्रेक फेल झाल्याने चालकाचा बसवरील ताबा सुटला.
अवघ्या काही क्षणांत बस वेगाने पुढे सरकू लागल्याने प्रवाशांमध्ये एकच घबराट उडाली. मात्र चालक अनिल साबळे यांनी प्रसंगावधान राखत बस उजव्या बाजूला वळवली. त्यामुळे बस संरक्षक भिंतीवर आदळून थांबली. बस डाव्या बाजूला गेली असती तर ती थेट दरीत कोसळली असती.चालकाच्या प्रसंगावधानामुळे मोठी जीवितहानी टळल्याचे सांगण्यात येत आहे.
अपघातात देऊ पोकळा, करुणा मधे, करण भुतांबरे, हिरा उर्फ वैशाली देसले, मंगळी वीर, धोंडू देसले, शिडू हंबीर, आशा देसले, कमल लखांबरे, भागी पादीर, ज्योती लखांबरे, सपना भगत, फसाबाई देसले, चंद्रकांत जाधव, वैशाली फसाळे, शांता फसाळे व कांचन हिंदोळे यांच्यासह प्रवासी जखमी झाले आहेत.
जखमींना स्थानिकांनी मदत करून शहापूर उपजिल्हा रुग्णालयात दाखल केले. एकाची प्रकृती बिघडल्याने त्याला ठाणे सिव्हिल रुग्णालयात हलविण्यात आल्याची माहिती सूत्रांनी दिली.
जखमी प्रवाशांना नियमानुसार मदत
ब्रेक निकामी झाल्यानंतर बस दरीत जाण्यापासून रोखणे हे चालकासमोर मोठे आव्हान होते. मात्र अनिल साबळे यांनी वेळीच बस उजवीकडे वळविल्याने ती संरक्षक भिंतीवर आदळून थांबली. बस दरीत कोसळली असती तर मोठी जीवितहानी होण्याची शक्यता होती.
त्यामुळे चालकाच्या प्रसंगावधानाचे कौतुक होत आहे. दरम्यान, चालकाचा ताबा सुटल्याचे शहापूर आगार व्यवस्थापक मानसी शेळके यांनी सांगितले. जखमी प्रवाशांना नियमानुसार प्राथमिक आर्थिक मदत देण्यात येणार असल्याचेही त्यांनी स्पष्ट केले.