ठाणे : पिढ्या कितीही डिजिटल झाल्या तरी लग्न अरेंज असो की, लव्ह मॅरेज असो, हजारोजण मुहूर्त पाहूनच बोहल्यावर चढतात; मात्र यंदा नोव्हेंबर-डिसेंबर 2025 मध्ये बोटांवर मोजण्याइतके मुहूर्त आहेत. नव्या वर्षाच्या आरंभाला जानेवारीत तर एकही लग्नाची तारीख नाही. फेब्रुवारी ते जुलै 2026 मध्ये लग्नविधीसाठी मुहूर्त असले, तरी त्यानंतर चातुर्मास, पितृपक्ष आणि नंतर येणार्या सिंहस्थामुळे ऑगस्ट ते डिसेंबर या काळात लग्नाचे मुहूर्त नाहीत. त्यामुळे बोहल्यावर चढू इच्छिणार्यांनी आत्ताच घाई केली, तर पुढच्या 6 महिन्यांतील मुहूर्त हाती लागणार आहेत.
दिवाळीनंतर तुळशी विवाह झाला की, लगीनघाई सुरू होते. त्यामुळे लग्न जुळलेल्या घरांमध्ये सनई-चौघडे वाजू लागतात. यंदा मात्र दिवाळीनंतर नोव्हेंबर 2025 या महिन्यात केवळ 23, 25 आणि 26, 27, 30 नोव्हेंबर एवढेच 5 मुहूर्त आहेत. डिसेंबरमध्ये 2 आणि 5 याच दोन तारखा आहेत.
नव्या वर्षांच्या प्रारंभाला म्हणजे जानेवारीत एकही विवाह मुहूर्त नाहीत. फेब्रुवारी महिना हा प्रेमाचा महिना समजला जातो. त्यामुळे तरुणाईचा फेब्रुवारी महिन्यात लग्नगाठ बांधण्याकडे कल वाढला आहे. फेब्रुवारी 2026 मध्ये विवाहाचे तब्बल 10 मुहूर्त आहेत. मार्चमध्ये 7, एप्रिलमध्ये 6, मे मध्ये 8 तर जून आणि जुलैमध्ये अनुक्रमे 5 आणि 7 मुहूर्त आहेत, अशी माहिती प्रसिद्ध पंचांगकर्ते दा. कृ. सोमण यांनी दिली.
विवाह मुहूर्त
2025 : नोव्हेंबर : दि.23, 25,26,27, 30. डिसेंबर 2025 : दि. 2 व 5.
2026 : जानेवारीत मुहूर्त नाहीत. फेब्रुवारी : दि. 3, 5, 6, 7, 8, 10, 11, 20, 25, 26. मार्च : दि. 5, 7, 8, 12, 14, 15, 16. एप्रिल : दि. 21, 26, 28, 29, 30. मे : दि. 1, 3, 6, 7, 8, 9, 10, 13, 14. जून : दि. 19, 20, 23, 24, 27. जुलै : दि. 1, 2, 3, 4, 8, 9, 11. ऑगस्ट ते डिसेंबर : विवाह मुहूर्त नाहीत.