भिवंडी : मुंबई-नाशिक महामार्गावरील भिवंडी तहाने बायपास रस्त्यावर झालेल्या भीषण अपघातात बापलेकीचा दुर्दैवी मृत्यू झाला असून पत्नी गंभीर जखमी झाली आहे. सईम मकबूल खोत (48) व मरियम खोत (6) असे मयत बापलेकीचे नाव असून पत्नी सुबी खोत गंभीर जखमी आहे.
पडघा नजीकच्या बोरिवली गावातील सईम खोत पत्नी सुबी व सहा वर्षांची मुलगी मरियम असे दुपारी मरियम हिला दवाखान्यात तपासणीसाठी भिवंडी येथे आपल्या दुचाकीवरून निघाले होते. त्यांची दुचाकी कुकसे गावाच्या हद्दीत साई धारा गोदाम कॉम्प्लेक्स समोरील रस्त्यावर आले असता त्यांच्या पाठीमागून आलेल्या भरधाव ट्रॅक ने दिलेल्या धडकेत खोत यांची दुचाकी ट्रकच्या चाकाखाली येऊन चिरडले गेले.
यामध्ये खोत बापलेकीचा जागेवरच मृत्यू झाला. तर गंभीर जखमी पत्नी सुबी खोत यांना ठाणे येथील खासगी रुग्णालयात उपचारासाठी दाखल केले आहे. दरम्यान या दुर्दैवी घटने नंतर बोरिवली गावात शोककळा पसरली आहे.