डोंबिवली : कल्याण-मलंगगड रोडला असलेल्या आडिवली-ढोकळी एरियाचा मी आहे, हे तुला माहिती नाही का ? तुला माझे नाव माहिती नाही का ? असे दरडावत गोकुळ झा याने दोन महिन्यांपूर्वी आडिवली-ढोकळीतील एका सोसायटीच्या वॉचमनवर धारदार हत्याराने वार करून त्याला गंभीर जखमी केले होते. गोकुळ झा याचा हा कारनामा मराठी रिसेप्शनिस्ट तरूणीवर केलेल्या हल्ल्याच्या गुन्ह्याची चौकशी सुरू असताना पुढे आला आहे.
रिसेप्शनिस्ट तरूणीवर केलेल्या हल्ल्याच्या प्रकरणात गोकुळची दोन दिवसांची पोलिस कोठडी संपल्यानंतर मानपाडा पोलिसांनी त्याला शुक्रवारी कल्याण जिल्हा व सत्र न्यायालयासमोर हजर केले होते. न्यायालयाने त्याला तुरूंगात पाठविण्याचे आदेश दिले. त्याप्रमाणे गोकुळची रवानगी आधारवाडी कारागृहात करण्यात येणार होती. गोकुळ झाची गुन्हेगारी पार्श्वभूमी तपासताना त्याच्यावर विठ्ठलवाडी आणि कोळसेवाडी पोलिस ठाण्यात यापूर्वी गुन्हे दाखल असल्याची माहिती पोलिसांना मिळाली होती.
पोलिसांच्या तपासात गोकुळने १६ मे २०२५ रोजी मध्यरात्री अडीचच्या सुमारास दरम्यान आडिवली-ढोकळीतील पिंट्या डेव्हिड (४०) या इमारतीच्या वॉचमनवर धारदार हत्याराने हल्ला केला असल्याचे तपासात पुढे आले. पिंट्या डेव्हिड याने दिलेल्या फिर्यादीनुसार आडिवली-ढोकळीतील तिरूपती भवन सोसायटीत आपण पाणी सोडण्याचे काम करत असतो. याच इमारतीच्या तळमजल्यावर असलेल्या जागेत रात्री झोपत असतो. १६ मे रोजी मध्यरात्री वॉचमन पिंट्या डेव्हिड लघुशंकेसाठी उठला. त्यावेळी त्याला रस्त्यावर दोन दुचाकीवर चौघे बसल्याचे दिसले. त्यातील गोकुळ झा याने वॉचमन पिंट्या याला हाक मारली. जवळ गेलो असता या एरीयाचा भाई कोण ? असा सवाल केला. पिंट्याने मला माहिती नाही असे उत्तर दिले. त्यावेळी संतापलेल्या गोकुळ झाने मी या परिसराचा भाई असताना तु मला माहिती नाही असे उत्तर कसे देतो, असा सवाल करत गोकुळने वॉचमन पिंट्या याच्याशी वाद घालून त्याल मारहाण केली.
गोकुळच्या तावडीतून सुटका करवून वॉचमन पिंट्या डेव्हिडने तेथून पळ काढला. मात्र गोकुळने पिंट्याचा पाठलाग करत सोबत आणलेल्या धारदार हत्याराने त्याच्या पाठीवर वार केले. त्यानंतर गोकुळ आणि त्याचे साथीदार पळून गेले. ही माहिती वॉचमन पिंट्याने सोसायटीच्या पदाधिकाऱ्यांसह त्याच्या भावाला दिली. मध्यरात्री मानपाडा पोलिस ठाणे गाठले आणि डोंबिवलीच्या शास्त्रीनगर रूग्णालयात उपचार केल्यानंतर वॉचमन पिंट्या डेव्हिडने हल्लेखोर गोकुळ झा याच्या विरोधात फिर्याद दाखल केली. पोलिसांनी भारतीय न्याय संहितेअन्वये गोकुळच्या विरोधात गुन्हा दाखल केला होता.
हे प्रकरण मराठी तरूणीच्या हल्ल्या प्रकरणात पोलिसांनी पुन्हा बाहेर काढले आहे. गोकुळ झा याला न्यायालयीन कोठडी सुनावली असली तरी मानपाडा पोलिस ठाण्यातील वॉचमन पिंट्या डेव्हिड याच्यावर केलेल्या हल्ल्याच्या प्रकरणात गोकुळ याला फेरचौकशीसाठी ताब्यात घेतल्याची माहिती पोलीस उपायुक्त अतुल झेंडे यांनी दिली.