अंबरनाथ/बदलापूर (ठाणे ) : न्यायालयीन अपील दाखल झालेल्या नगरपरिषदा व नगरपंचायती मधील सार्वत्रिक निवडणुकांसाठी सुधारित निवडणूक कार्यक्रम जाहीर करण्यात आले आहे. त्यानुसार अंबरनाथ नगर परिषदेची निवडणूक देखील पुढे ढकलण्यात आली असून दोन डिसेंबर रोजी होऊ घातलेली अंबरनाथ नगर परिषदेची निवडणूक आता २० डिसेंबर रोजी होणार असल्याचे निवडणूक आयोगाने जाहीर केलेल्या निवडणूक कार्यक्रमांमध्ये समाविष्ट करण्यात आले आहे. या नव्या निवडणूक कार्यक्रमामुळे नगरसेवक व नगराध्यक्ष पदाचे उमेदवारांमध्ये कमालीचा संताप व्यक्त होत आहे.
कुळगांव-बदलापूर नगर परिषदेची निवडणूक येत्या २ डिसेंबरला होणार आहे. परंतु कुळगाव-बदलापूर नगर परिषद क्षेत्रातील ६ जागांसाठी निवडणूक स्थगित करण्यात आली आहे. परंतु कुळगांव-बदलापूर नगर परिषद क्षेत्रातील ६ जागांसाठी निवडणूक स्थगित करण्यात आली आहे. अर्ज अवैध ठरल्यानंतर उमेदवारांनी दाखल केलेल्या दाव्यांवरती न्यायालयाचा लागलेला निकाल, अर्ज मागे घेण्यासाठी मिळालेला कमी कालावधी आणि अशा प्रक्रियेत आधीच वाटप झालेले चिन्ह या सर्व गोष्टींमुळे राज्य निवडणूक आयोगाने अशा ठिकाणी नगरपरिषद निवडणूक स्थगित करण्याचे आदेश दिले आहेत. ही निवडणूक आता २० दिवस लांबणीवर गेली असून पूर्वी २ डिसेंबरला होणारे मतदान आता २० डिसेंबरला होणार आहे.
नगरपरिषदेचा सार्वत्रिक निवडणूक कार्यक्रम ४ नोव्हेंबर रोजी जाहीर झाला होता. तर दोन डिसेंबर रोजी अंबरनाथमध्ये प्रत्यक्षात मतदान होणार होते. मात्र २९ नोव्हेंबर रात्री उशिरा निवडणूक आयोगाकडून, न्यायालयीन अपील दाखल झालेल्या नगरपरिषदा व नगरपंचायती मधील सार्वत्रिक निवडणुकांसाठी सुधारित निवडणूक कार्यक्रम जाहीर करण्यात आल्याने सर्वांचेच धाबे दणाणले आहेत. तब्बल १८ दिवस निवडणूक पुढे गेल्याने
निवडणुकीतील जोश कमी झाल्याचे दिसून आले. निवडणूक आयोगाने प्रसिद्ध केलेल्या नवीन निवडणूक कार्यक्रमानंतर अंबरनाथ नगरपरिषदेतील निवडणूक अधिकाऱ्यांनी अंबरनाथमध्ये कोणतेही अपील प्रलंबित नसून सर्व प्रक्रिया सुरळीत झाल्याने अंबरनाथमध्ये निवडणूक प्रक्रिये बाबत मार्गदर्शन मागवण्यात आल्याचे सहाय्यक निवडणूक निर्णय अधिकारी उमाकांत गायकवाड यांनी पत्रकारांशी बोलताना सांगितले. त्यामुळे रविवारी रात्री उशिरापर्यंत निवडणूक आयोगाचा निर्णय आल्यानंतर अंबरनाथ मध्ये होऊ घातलेली निवडणूक दोन डिसेंबर रोजी होणार की, २० डिसेंबर रोजी होईल. याबाबत स्पष्टता होणार आहे. अंबरनाथ मध्ये १७ नोव्हेंबर पर्यंत सदस्य पदासाठी ४०० अर्ज, तर नगराध्यक्ष पदासाठी १४ अर्ज दाखल झाले होते. या अर्जाची छाननी १८ नोव्हेंबर रोजी झाल्यानंतर त्यातील १३ प्रकरणामध्ये जिल्हा सत्र न्यायालयात अपील दाखल करण्यात आले होते. त्याची सुनावणी २४ नोव्हेंबर रोजी होऊन, २५ नोव्हेंबर रोजी निकाल देण्यात आला. त्यातील एक अपील हे नगराध्यक्ष पदासाठीचे होते. ते अपील न्यायालयाने फेटाळले होते. त्यामुळे कोणतेही अपील अंबरनाथमध्ये प्रलंबित नसल्याने अंबरनाथमध्ये नवीन निवडणूक कार्यक्रम अमलात आणावा का? याबाबत माहिती मागविण्यात आल्याने, अंबरनाथमध्ये सद्या संभ्रमाचे वातावरण आहे. मात्र नव्याने जाहीर करण्यात आलेला निवडणूक कार्यक्रम अंबरनाथसाठी देखील लागू होईल व अंबरनाथ ची निवडणूक २० डिसेंबर रोजी होईल, असे निवडणूक निर्णय अधिकारी विजयानंद शर्मा यांनी प्रसिद्ध केलेल्या पत्रकात स्पष्ट केले आहे.
निवडणूक आयोगाच्या आदेशानुसार कुळगांव-बदलापूर नगर परिषदेतील प्रभाग क्रमांक १५ ब, प्रभाग क्रमांक १७ अ, प्रभाग क्रमांक १० ब, प्रभाग क्रमांक ८ अ, प्रभाग क्रमांक ५ व व प्रभाग क्रमांक १९ अया प्रभागात २ डिसेंबरला होणाऱ्या मतदानाला स्थगिती देण्यात आली आहे. उर्वरित सर्व प्रभागात पूर्वी जाहीर केल्याप्रमाणे २ डिसेंबरला मतदान होणार आहे. तर स्थगिती देण्यात आलेल्या ६ प्रभागात २० डिसेंबरला मतदान - होणार असल्याचे निवडणूक निर्णय अधिकारी विश्वास गुजर यांनी स्पष्ट केले. कुळगांव बदलापूर नगर परिषदेच्या निवडणुकांसाठी १८१ टपाली मतदान झाल्याची माहिती सहाय्यक निवडणूक निर्णय अधिकारी मारुती गायकवाड यांनी दिली.
उमेदवारांसह पदाधिकाऱ्यांची धाकधूक वाढली
निवडणूक प्रचार शेवटच्या टप्प्यात आला असताना आणि मतदानासाठी अवघे दोन दिवस शिल्लक राहिले असताना राज्य निवडणूक आयोगाने घेतलेल्या या निर्णयामुळे उमेदवारांमध्ये मोठा गोंधळ आहे. तसेच बदलापूर नगरपालिकेत ज्या उमेदवारांचे अर्ज निवडणूक निर्णय अधिकाऱ्यांनी बाद केले होते त्यांचे अर्ज कोर्टानेही फेटाळले आहेत. त्यामुळे अशा ठिकाणी स्थगिती देण्याचे कारण काय, असा सवाल विद्यमान उमेदवार विचारत आहेत. मात्र तांत्रिक कारण देत निवडणूक आयोगाने याबाबत अधिक भाष्य करणे टाळले आहे. एकूणच बदलापूर शहरात दोन तारखेपर्यंत निवडणुकीचे वातावरण आता वीस तारखेपर्यंत कायम राहणार असल्याने उमेदवारांसह स्थानिक नेत्यांचे आणि पदाधिकाऱ्यांची ही धाकधूक वाढली आहे.
राजकीय पक्षांमध्ये संभ्रमाचे वातावरण
कुळगांव-बदलापूर नगरपालिकेच्या सहा प्रभागांमध्ये निवडणुकीला राज्य निवडणूक आयोगाने स्थगिती दिल्यानंतर बदलापूर मधील राजकीय पक्षांमध्ये संभ्रमाचे वातावरण निर्माण झाले असून विशेष करून या सहा प्रभागातील अ आणि ब या दोन्ही उमेदवारांमध्ये संभ्रमाचे वातावरण निर्माण झाले आहे. कारण अनेक उमेदवार हे एकत्र प्रचार करत होते. त्यामुळे आता एक निवडणूक पहिले आणि एक निवडणूक नंतर होणार असल्यामुळे उमेदवारांच्या खर्चाचा ताळमेळ बसणार नसल्याने अनेक - उमेदवारांमध्ये निवडणूक आयोगाच्या कारभाराविषयी प्रचंड नाराजी पसरली आहे.