सोलापूर; पुढारी वृत्तसेवा : कुंभारी, (ता. दक्षिण सोलापूर) येथे असंघटित कामगारांसाठी उभारण्यात येत असलेल्या 30 हजार घरकुलांपैकी 15 हजार घरकुलांचे काम अंतिम टप्प्यात आले असून, त्याची पाहणी शुक्रवारी केंद्रीय समितीच्या वतीने करण्यात आली आहे. यावेळी केंद्रीय गृहनिर्माण विभागाचे उपसचिव एस. के. बब्बर यांनी या ठिकाणी होत असलेल्या कामाचा आढावा घेतला.
कुंभारी येथील देशातील सर्वात मोठ्या गृहनिर्माण सोसायटीचे काम सुरू आहे. त्या ठिकाणी बाह्य आणि अंतर्गत सेवासुविधांचा आढावा केंद्रीय समितीने शुक्रवारी घेतला. या ठिकाणी पाणीपुरवठा, विद्युत पुरवठा, शिक्षण, अंगणवाडी, घनकचना आणि सांडपाणी व्यवस्थापनासाठीच्या काय उपाययोजना करण्यात आल्या आहेत, याचा आढावा या समितीने घेतला आहे. येत्या नोव्हेंबर ते डिसेंबरदरम्यान या गृहप्रकल्पातील पहिल्या टप्प्यातील लाभार्थ्यांना त्याचे वाटप करण्यात येणार आहे. या गृहनिर्माण प्रकल्पातील 30 हजार घरकुलांपैकी पहिल्या टप्प्यातील 15 हजार घरकुलांचे काम अंतिम टप्यात आलेले आहे. त्यासाठी देशाचे पंतप्रधान नरेंद्र मोदी हे सोलापूर दौर्यावर येणार आहेत. त्यांच्या उपस्थितीत लोकार्पण सोहळा होणार आहे. त्या अनुषंगाने या ठिकाणी पुरविण्यात येणार्या सेवासुविधांचा आढावा घेण्यात आला.
यावेळी मुख्य अभियंता सुनील जाधव, जीवन प्राधिकरणाचे कार्यकारी अभियंता संतोष गाडेकर यांच्यासह प्रमुख अधिकारी उपस्थित होते. यावेळी बब्बर यांनी लोकार्पण सोहळ्यापूर्वी बाह्य आणि अंतर्गत सेवासुविधांची कामे पूर्ण करा. यामध्ये कोणत्याही प्रकरच्या त्रुटी राहु नयेत याची दक्षता घ्या, अशा सूचना अधिकार्यांना दिल्या आहेत.