पंढरपूर; पुढारी वृत्तसेवा : पंढरपूर नगरपषिद निवडणुकीची तारीख जाहीर झाली आहे. येत्या 18 ऑगस्ट रोजी मतदान तर 19 ऑगस्टला मतमोजणी होणार आहे. त्यामूळे सत्ताधार्यांसह विरोधकही जोमाने तयारीला लागले आहेत. आज गुरुवार दि. 14 रोजी विरोधक असलेले भालके गटाची विचारविनिमय बैठक आयोजित करण्यात आली आहे. तर परिचारक गट अगोदरच तयारी करीत असल्याने निवडणूक लक्षवेधी ठरणार आहे.
डिसेंबर 2021 रोजी मुदत संपलेल्या पंढरपूर नगरपरिषदेच्या सार्वत्रिक निवडणुकांच्या अनुषंगाने प्रभाग रचना, प्रारूप मतदार याद्या व आरक्षण प्रक्रिया पूर्ण झाली आहे. यावर राज्य निवडणूक आयोगाकडून काल शुक्रवारी मतदान व मतमोजणीच्या तारखा जाहीर केले आहेत. यामध्ये 20 जुलै रोजी मा. जिल्हाधिकारी यांच्याकडून निवडणूक कार्यक्रम जाहीर करण्यात येणार आहे. तर 22 जुलै रोजी सकाळी 11 ते 28 जुलै रोजी दुपारी 2 पर्यंत उमेदवारी अर्ज निवडणूक आयोगाने निश्चित केलेल्या वेबसाईटवर भरण्याकरिता उपलब्ध राहणार आहे. उमेदवारांनी भरलेल्या उमेदवारी अर्जाची छाननी 29 जुलै रोजी पार पडणार आहे. तसेच उमेदवारी अर्ज मागे घेण्याची शेवटची मुदत 4 ऑगस्ट दुपारी 3 वाजेपर्यंत असणार आहे. यासह 18 ऑगस्ट रोजी सकाळी 7 वा. 30 मी. ते सायंकाळी 5 वा. 30 मी. पर्यंत मतदान प्रक्रिया पार पडणार आहे. तर 19 ऑगस्ट रोजी मतमोजणी आणि निकाल जाहीर करण्यात येणार आहे.
पंढरपूर नगरपरिषदेत निवडणुकीत या पूर्वी 34 नगरसेवक निवडून दिले जात होते. सध्या शहराच्या वाढीव लोकसंख्येनुसार एका प्रभागात 2 सदस्य, यांप्रमाणे 18 प्रभागात 36 सदस्य निवडून द्यावयाचे आहेत. त्या अनुषंगाने सत्ताधार्यांसह विरोधकांकडून संभाव्य उमेदवार आणि मतदारांची जुळवाजुळवी सुरू झाली आहे. सत्ताधारी परिचारक गटाला रोखायचे असेल तर परिचारक विरोधी सर्वपक्षीय आघाडी एकत्रित येणे गरजेचे आहे. यासाठीदेखील आजच्या बैठकीत चर्चा होण्याची शक्यता आहे. सर्वांचे लक्ष लागून राहिलेल्या पंढरपूर नगरपरिषद निवडणुकीसाठी भावी नगरसेवक जोमाने कामाला लागल्याचे दिसून येत आहे.