सोलापूर; पुढारी वृत्तसेवा : कार्तिकी एकादशी 23 नोव्हेंबरला असल्याने यादिवशी शासकीय महापूजा उपमुख्यमंत्र्यांच्या हस्ते होत असते. तरी सर्व संबंधित विभागांनी त्यांच्यावर सोपवलेली जबाबदारी परस्परांत योग्य समन्वय ठेऊन चोखपणे पार पाडावी, अशा सूचना पालकमंत्री पाटील यांनी दिल्या.
'कार्तिकी'च्या अनुषंगाने दूरद़ृश्यप्रणालीद्वारे आयोजित बैठकीत त्यांनी मार्गदर्शन केले. यावेळी जिल्हाधिकारी कुमार आशीर्वाद, पोलिस अधीक्षक शिरीष सरदेशपांडे, अप्पर जिल्हाधिकारी तुषार ठोंबरे, अतिरिक्त पोलिस अधीक्षक हिंमत जाधव, निवासी उपजिल्हाधिकारी दादासाहेब कांबळे, प्रांताधिकारी गजानन गुरव, मंदिर समितीचे कार्यकारी अधिकारी राजेंद्र शेळके, अतिरिक्त मुख्य कार्यकारी अधिकारी संदीप कोहिनकर, बांधकाम विभागाचे कार्यकारी अभियंता अमित निमकर, जिल्हा आपत्ती व्यवस्थापन अधिकारी शक्तीसागर ढोले, तहसीलदार सुशील बेल्हेकर, नगरपालिका मुख्याधिकारी प्रशांत जाधव उपस्थित होते.
यात्रेनिमित्त पंढरपूर शहरात येणार्या आठ ते दहा लाख भाविकांसाठी पुरेशा प्रमाणात शौचालये उपलब्ध ठेवावीत. शौचालयासाठी पाणी व शौचालय साफसफाई करणारे कर्मचारी ठेवावे. आवश्यक त्याठिकाणी तात्पुरत्या स्वरूपातील शौचालये ठेवावीत. तसेच शहरात कोठेही अस्वच्छता राहणार नाही यासाठी दक्षता घ्यावी. यात्रेनिमित्त निर्माण करण्यात येणार्या पाच आपत्ती व्यवस्थापन कक्षांवर नियंत्रण ठेवण्यासाठी मध्यवर्ती नियंत्रण कक्ष तयार करावा. दर्शन रांग खूप लांब जात असल्याने दर्शन रांगेत ठिकठिकाणी भाविकांना विसावा घेण्यासाठी जागा उपलब्ध करुन द्यावी. त्याठिकाणी सोयीसुविधा निर्माण कराव्यात. स्कायवॉकच्या ठिकाणीही भाविकांसाठी बैठकीची व्यवस्था करावी, अशा सूचना पालकमंत्री पाटील यांनी दिल्या.
कार्तिकी यात्रा 14 ते 27 नोव्हेंबर याकालावधीमध्ये होत आहे. या यात्रेसाठी येणार्या भाविकांना सोयीसुविधा उपलब्ध करून द्याव्यात. त्यासाठी आवश्यक निधी जिल्हा नियोजन समिती व सीएसआर फंडातून उपलब्ध करून देण्यात येईल.
– चंद्रकांत पाटील, पालकमंत्री