मोहोळ : जिल्हा परिषदेच्या प्राथमिक शिक्षकांच्या ऑनलाईन जिल्हांतर्गत बदलीप्रकरणी औरंगाबाद उच्च न्यायालयाने अंतिम निकाल दिल्याने जिल्हांतर्गत बदलीचा मार्ग मोकळा झाला आहे. या निकालामुळे बदली इच्छुक शिक्षकांना दिलासा मिळाला आहे. मे महिन्याची 10 तारीख उलटली आहे. ही ऑनलाईन बदली प्रक्रिया केव्हा सुरु होते ? आणि या बदल्या कधी होणार? याकडे सर्व शिक्षकांचे लक्ष लागले आहे.
जिल्हा परिषद प्राथमिक शिक्षकांची जिल्हा अंतर्गत बदली प्रक्रिया ही ग्रामविकास विभागामार्फत ऑनलाईन पद्धतीने राबविली जाते. त्याचप्रमाणे जिल्हा परिषद प्राथमिक शिक्षकांच्या आंतर जिल्हा बदली प्रक्रियादेखील ऑनलाईन पद्धतीने राबविली जाते. जे शिक्षक आंतरजिल्हा बदली आपसी बदलीद्वारे आले होते त्यापैकी कनिष्ठ शिक्षकांची सेवा ही बदलीसाठी ग्राह्य धरावी याकरिता शिक्षकांनी न्यायालयात धाव घेतली होती. या अनुषंगाने आपसी जिल्हा सेवाज्येष्ठते संदर्भात निर्णय घेण्यासाठी न्यायालयाने या जिल्हा अंतर्गत बदली प्रक्रियेला 5 मे पर्यंत स्थगित दिली होती.
5 मे रोजी न्यायालयात यावर सुनावणी होऊन 9 मे रोजी न्यायालयाने अंतिम निकाल दिला आहे. न्यायालयाच्या या निर्णयानुसार आंतरजिल्हा बदलीमधील आपसी बदलीद्वारे बदली झालेल्या शिक्षकांपैकी सेवा कनिष्ठ शिक्षकांची सेवा दोन्ही शिक्षकांना बदलीसाठी ग्राहा धरावी, असा निकाल दिला आहे.
स्थानिक स्वराज्य संस्थेच्या निवडणुका चार महिन्यांत घेण्याचे आदेश सर्वोच्च न्यायलयाने दिलेले आहेत. त्यामुळे शिक्षकांची ही बदली प्रक्रिया आता स्थानिक स्वराज्य संस्थांच्या निवडणुकीपूर्वी होणे गरजेचे आहे. याकडे प्रशासकीय पातळी वरून विलंब झाला आणि निवडणुकांची आचारसंहिता लागली तर बदली प्रक्रियेमध्ये अडथळा येऊ शकतो.- संजिव चाफाकरंडे, जिल्हाध्यक्ष, आदर्श शिक्षक समिती, सोलापूर .
आता मात्र ग्रामविकास विभागाने तातडीने जिल्हांतर्गत बदली प्रक्रिया राबविण्यास सुरुवात करावी. ही बदलीची प्रक्रिया पुढील शैक्षणिक वर्षामध्ये वेळेत पूर्ण होणे तितकेच गरजेचे आहे. कारण स्थानिक स्वराज्य संस्थेच्या निवडणुका चार महिन्यांत घेण्याचे आदेश सर्वोच्च न्यायलयाने दिलेले आहेत. त्यामुळे ही प्रक्रिया वेळेत पूर्ण झाली नाही तर आचारसंहितेमुळे बदली प्रक्रिया थांबण्याची भीती शिक्षकांना वाटत आहे.- रणजित थिटे, जिल्हा कार्यकारी अध्यक्ष, शिक्षक संघ (थोरात गट), सोलापूर.