पंढरपूर : मार्गशिर्ष महिन्यात श्री विठ्ठलाचे वास्तव्य महिनाभर गोपाळपूर येथील विष्णुपद मंदिरात असते. अशी अख्यायीका आहे. त्यामुळे विष्णुपद महोत्सवात सहभागी होण्यासाठी तसेच वनभोजन करण्यासाठी भाविक पंढरीत गर्दी करीत आहेत. यातच रविवारी संकष्टी चतुर्थी असल्याने दर्शनासाठी भाविकांनी पंढरपूरात गर्दी केली आहे.
शनिवार आणि रविवार या दोन दिवसाच्या सुट्टीत लाखो भाविक आराध्य दैवत असलेल्या पंढरपूरच्या श्री विठ्ठल-रुक्मिणी मंदिरात दर्शनासाठी भाविकांची मोठी गर्दी केली आहे. श्री विठ्ठल-रुक्मिणीच्या दर्शनाची रांग थेट चंद्रभागातीरावरील सारडा भवनच्या पुढे विप्रदत्त घाटापर्यंत पोहोचली आहे. आणखी रांगे पुढे सरकत चालली आहे.
विष्णुपद महोत्सवानिमित्त पंढरपूर येथे श्री विठ्ठल-रुक्मिणी दर्शनासाठी आलेले भाविक हे चंद्रभागा स्नानासाठी गर्दी करत आहेत. दर्शन रांगेतील भाविकांना मंदिर समितीकडून पिण्याचे शुध्द पाणी, वॉटरफ्रुफ दर्शन शेड उभारुन सेवा देण्यात आलेली आहे. मात्र काही ठिकाणी मॅटच टाकण्यात आलेले नाही. त्यामुळे भाविकांंना धूळ व खडी तुडवत वाट काढावी लागत आहे. शनिवार व रविवार विकेंड असल्याने सलग दोन दिवस सुट्टी आली. यामुळे राज्यभरातील व परराज्यातूनही हजारो भाविक श्री विठ्ठलाचे दर्शन घेण्यासाठी दाखल झाले आहेत. भाविकांच्या वाहनांची देखील पार्किंग हाऊसफुल्ल झाले असल्याचे चित्र दिसून येत आहे.
गोपाळूपर रोडवरील चंद्रभागा नदीपात्रातील विष्णूपद मंदिर या ठिकाणी दर्शनरांगेसाठी बॅरीकेटींग, सुरक्षा व्यवस्थेकामी कमांडोज, पिण्याच्या पाण्याची सोय, चांगली स्वच्छता व्यवस्था, अभिषेक पुजा भाविकांना उपलब्ध करून देण्यात आली आहे.
विद्युत रोषणाई व इतर अनुषंगीक व्यवस्था करण्यात येत आली आहे. या ठिकाणी वन भोजनाची प्रथा असल्याने स्वच्छतेसाठी जादा कर्मचाऱ्यांची नियुक्ती करण्यात आली आहे. पंढरपूरात श्री विठ्ठल-रुक्मिणी दर्शनासाठी आलेले भाविक चंद्रभागा नदीत स्नान करण्यास प्राधान्य देत आहेत. मुख दर्शन, कळस दर्शन तसेच पदस्पर्श दर्शन घेवून भाविक धन्यता मानत आहेत. तसेच विठ्ठल-रुक्मिणी दर्शन घेवून भाविक विष्णुपद येथे दर्शनासाठी हमखास जातच आहेत. यामुळे भाविकांची गर्दी वाढत असल्याने बाजारपेठेतही मोठी आर्थिक उलाढाल होताना दिसत आहे.