अकलूज : मागील काही दिवसांपासून नीरा खोर्यात झालेल्या मुसळधार पावसामुळे नीरा नदीला मोठ्या प्रमाणात पाणी आल्याने ती दुथडी भरुन वाहू लागली आहे. माळशिरस, अकलूज परिसरातून भीमा नदीला नीरेचे पाणी मिळत आहे. त्यामुळे पाटंबधारे विभागाने नीरा, भीमा नदीवरील कोल्हापूर पद्धतीच्या बंधार्यांवरून होणारी वाहतूक बंद केली आहे.
मागील काही दिवसांपासून नीरा खोरे व भीमा खोर्यामध्ये मोठ्या प्रमाणात पाऊस झाला आहे. यामुळे सद्यस्थितीत नीरा नदीपात्रात लाटे येथे 26 हजार 525 क्युसेक इतका विसर्ग येत आहे. यामुळे नीरा नदी दुथडी भरुन वाहत आहे. भीमा पाटबंधारे विभागाने नीरा नदीला पुराचा इशारा दिला आहे. माळशिरस तालुका प्रशासनाच्या वतीनेही नदीकाठच्या गावांना सतर्कतेचा इशारा दिला आहे.
ऐन उन्हाळ्यातील मे महिन्यात सुरू झालेल्या पावसामुळे नीरा खोर्यातील नदी, ओढे, नाले तुडुंब भरून वाहू लागले आहेत. माळशिरस तालुक्याच्या पश्चिम भागात असणार्या धर्मपुरी, फलटण, बारामती या भागात मुसळधार पाऊस झाला आहे. येथील पाणी नीरा नदीत येते. नीरा नदीचे पाणी भीमा नदीला मिळत असल्याने एकंदरीत भीमा नदीलाही पुरस्थिती निर्माण होण्याची शक्यता आहे. त्यामुळे नीरा व भीमा नदीकाठच्या गावांना सतर्कतेचा इशारा दिला आहे. पूर्व मोसमी पावसामुळे पहिल्यांदाच नीरा नदीला पूर आल्याचे बोलले जात आहे.
मागील काही दिवसांपासून नीरा खोरे व भीमा खोर्यामध्ये पाऊस झाला आहे. भीमा नदीपात्रातील कोल्हापूर पद्धतीच्या बंधार्यांंमध्ये आधीपासूनच पाणीसाठा आहे. त्यामुळे सद्यस्थितीतील विसर्ग पाहता भीमा नदीपात्रातील सर्व कोल्हापूर पद्धतीच्या बंधार्यांवरून पाणी जाण्याची शक्यता आहे. तसेच, माण नदीपात्रामध्येही पाण्याचा विसर्ग मोठ्या प्रमाणात वाढत आहे. त्यामुळे नागरिकांच्या सुरक्षिततेच्या दृष्टीने नीरा, भीमा व माण नदीवरील बंधार्यांवरून होणारी वाहतूक पूर्णपणे बंद करण्यात आली आहे.- ज्योती इंगवले, उपकार्यकारी अभियंता, भीमा पाटबंधारे विभाग पंढरपूर
माळशिरस तालुक्यात नीरा नदीवर अनेक छोटे-मोठे बंधारे आहेत. हे बंधारेही भरले जात आहेत. नदीला पूरस्थिती निर्माण झाली आहे. माळशिरस तालुक्यातील या नदीवरील प्रवासी वाहतूक असणारे कळंबोली व कुरबावी येथील पूल वाहतुकीसाठी बंद केले आहेत.- सुरेश शेजुळ, तहसीलदार, माळशिरस