सोलापूर : महापालिका अतिक्रमण प्रतिबंधक पथकाच्यावतीने मंगळवार दि. 18 नोव्हेंबर रोजी डफरीन चौक ते सात रस्ता चौकापर्यंत अतिक्रमण मोहिम हाती घेण्यात आली. यामध्ये संगमेश्वर महाविद्यालया जवळ असलेल्या पाच अतिक्रमण गाड्या जप्त करण्यात आल्या. तसेच फूटपाथ व माठ विक्रेत्यांचे अतिक्रमण काढण्यात आले.
अतिक्रमण हटविण्याची मोहीम महापालिका प्रशासनाकडून सकाळच्या सत्रामध्ये घेण्यात आली. पोलिस बंदोबस्तात जेसीबीच्या साह्याने व्हीआयपी रोड लगत असलेल्या पाच खोकी जागेवरच जमीनदोस्त करण्यात आली. महापालिका आयुक्त डॉ. सचिन ओम्बासे यांच्या आदेशानुसार ही कारवाई करण्यात आली. नियंत्रण अधिकारी तपन डंके यांच्या मार्गदर्शनाखाली अतिक्रमण प्रतिबंधक विभागाचे अधिकारी अधिकारी जगन्नाथ बनसोडे यांच्या पथकाने ही कारवाई केली. दुपारच्या सत्रामध्ये गुरूनानक चौकातील अतिक्रमणधारकांना समज देत 24 तासांची मुदत दिली आहे. 24 तासांत अतिक्रमण न काढल्यास अतिक्रमण काढून गाड्या जप्त करण्याचा इशारा दिला आहे.
दरम्यान विमानतळ परिसरात विमानाच्या उडाणा दरम्यान पक्षी व इतर अडथळे येत आहेत. यामुळे येथील अतिक्रमण हटविण्याची मोहीम सोमवारी महापालिका प्रशासनाकडून घेतली गेली. या मोहिमेत दहा खोकी जप्त करण्यात आली तर दोन खोकी जमिनदोस्त करण्यात आली.