सोलापूर : महानगरपालिकेच्या सार्वत्रिक निवडणुकीत 102 जागांसाठी गुरुवार, दि. 15 जानेवारी रोजी सकाळी 7.30 ते सायंकाळी 5.30 या वेळेत मतदान होणार आहे. शहरातील साडेनऊ लाख मतदार 564 उमेदवारांचा फैसला करणार आहेत. मतदान प्रक्रियेसाठी 353 इमारतींमध्ये एकूण 1,091 मतदान केंद्रांची उभारणी करण्यात आली आहे. यासाठी 3494 बॅलेट युनिटस्, 1365 कंट्रोल युनिटस् उपलब्ध करण्यात आले आहेत. प्रभागानुसार प्रत्येक मतदाराला तीन व चार मते द्यावी लागणार आहेत.
यंदा प्रथमच मतदान यंत्रावर मतपत्रिकांचे रंग वेगवेगळे राहणार आहेत. शुक्रवार, दि. 16 जानेवारी रोजी मतमोजणी होणार आहे. शहरातील 26 प्रभागांमध्ये 102 जागा आहेत. यासाठी शहरात 26 आदर्श मतदान केंद्र निर्माण करण्यात आले आहेत.
महापालिका आयुक्त तथा निवडणूक निर्णय अधिकारी डॉ. सचिन ओम्बासे यांच्या मार्गदर्शनाखाली अतिरिक्त आयुक्त वीणा पवार, संदीप कारंजे, उपायुक्त आशिष लोकरे, निवडणूक विभागाचे सहाय्यक आयुक्त गिरीश पंडित यांच्या माध्यमातून या निवडणुकीची जय्यत तयारी झाली आहे. सोलापूर महापालिका निवडणुकीसाठी 353 इमारतींमध्ये एकूण 1,091 मतदान केंद्रांची उभारणी करण्यात आली आहे. प्रभाग क्रमांक 1 ते 24 मधील मतदारांना चार मते द्यावी लागणार आहेत. पहिल्या, दुसऱ्या व तिसऱ्या जागेसाठी बटन दाबल्यानंतर उमेदवाराच्या नावासमोरील लाल दिवा लागेल, मात्र बीप आवाज येणार नाही. चौथ्या व शेवटच्या जागेसाठी मतदान केल्यानंतर दीर्घ बीप आवाज येईल. याच बीप आवाजानंतर मतदान प्रक्रिया पूर्ण झाल्याचे समजावे.
प्रभाग क्रमांक 25 व 26 साठी तीन मते द्यायची असून पहिल्या दोन जागांसाठी बीप आवाज येणार नाही, तर तिसऱ्या व अंतिम मतानंतर दीर्घ बीप ऐकू येईल. तसेच कोणताही उमेदवार पसंत नसल्यास प्रत्येक जागेसाठी नोटा पर्याय उपलब्ध आहे. मतदानाची वेळ सकाळी 7.30 ते सायंकाळी 5.30 वाजेपर्यंत राहणार आहे. यंदा ङ्गएक मतफ नव्हे तर प्रभागानुसार तीन किंवा चार मते द्यायची आहेत.
मतदान केंद्रांच्या संख्येच्या दृष्टीने प्रभाग क्रमांक 17 मध्ये सर्वाधिक 21 मतदान केंद्रे असून, त्याखालोखाल प्रभाग क्रमांक 9 मध्ये 18 मतदान केंद्रे आहेत. तसेच प्रभाग क्रमांक 8, 13, 22 आणि 24 या प्रभागांमध्येही तुलनेने अधिक मतदान केंद्रांची व्यवस्था करण्यात आली आहे. याउलट प्रभाग क्रमांक 1 आणि 25 मध्ये सर्वात कमी, प्रत्येकी 9 मतदान केंद्रे ठेवण्यात आली असून, प्रभाग क्रमांक 2, 11 आणि 26 मध्येही मतदान केंद्रांची संख्या मर्यादित आहे.प्रत्येक मतदान केंद्रावर एक केंद्राध्यक्ष, तीन पोलिंग ऑफिसर, एक शिपाई व एक पोलीस कर्मचारी असा कर्मचारी वर्ग राहणार आहे. .
46 मतदान केंद्रे संवेदनशील
मतदान प्रक्रिया सुरळीत पार पडावी यासाठी निवडणूक प्रशासनाने ईव्हीएम व साहित्याची व्यापक तयारी केली आहे. मतदान केंद्रांच्या गरजेनुसार 1 हजार 250 स्टेशनरी किट्स तसेच 2 हजार 500 बॅलेट युनिट कव्हर कंपार्टमेंट्सचा वापर करण्यात येत आहेत.46 मतदान केंद्रे संवेदनशील आहेत. त्यावर सीसीटीव्ही कॅमेरे तैनात करण्यात आले आहेत.
26 आदर्श मतदान केंद्रे
महानगरपालिकेच्या वतीने 26 आदर्श मतदान केंद्रेफ निर्माण करण्यात आली आहेत. प्रत्येक प्रभागात एक याप्रमाणे एकूण 26 मतदान केंद्रे आदर्श मतदान केंद्र म्हणून विकसित केली जाणार असून यामध्ये पर्यावरणपूरक हरित मतदान केंद्रे व महिला मतदान केंद्रांचा समावेश आहे.
पोलीस बंदोबस्त तैनात
कायदा व सुव्यवस्था व सुरक्षिततेसाठी एकूण 2 हजार 741 पोलीस बंदोबस्त तैनात करण्यात आला असून त्यामध्ये 151 पोलीस अधिकारी, 1680 पोलीस हवालदार,तसेच एसआरपीएफ च्या 2 कंपन्या यांचा समावेश आहे.
मतदानाच्या दिवशी कोणतीही अडचण येऊ नये यासाठी प्रशासन सज्ज आहे. या सर्व नियोजनामुळे सोलापूर महानगरपालिका सार्वत्रिक निवडणूक शांततापूर्ण, निर्भय व यशस्वीरीत्या पार पडेल. गुरुवार, दि. 15 जानेवारी रोजी सकाळी 7.30 ते सायंकाळी 5.30 या वेळेत होणाऱ्या मतदानात सोलापूरकरांनी शंभर टक्के सहभाग नोंदवावा- डॉ. सचिन ओम्बासे,आयुक्त तथा मुख्य निवडणूक अधिकारी