सोलापूर : शहरात असलेले सार्वजनिक विभागीय हद्दीत कार्यरत नळ टप्प्याटप्प्याने बंद करून त्याठिकाणी संबंधित नागरिकांना वैयक्तिक व ग्रुप नळ कनेक्शन देण्याचा निर्णय महापालिका प्रशासनाच्या वतीने घेण्यात आला. या नव्या प्रयोगामुुळे 80 टक्के पाणी वाचवण्यास मदत होईल. तीन दिवसाआड पाणी पुरवठा करण्यास मदत होणार असल्याचे अतिरिक्त आयुक्त संदीप कारंजे यांनी दिले सांगितले.
महानगरपालिकेचे अतिरिक्त आयुक्त संदीप कारंजे यांच्या अध्यक्षतेखाली मंगळवारी शहरातील पाणीपुरवठा व्यवस्थापन व सुधारणा विषयक बैठक घेण्यात आली. या बैठकीत सर्व विभागीय कार्यालयांच्या अधिकार्यांना कारंजे यांनी पाणीपुरवठा संदर्भातील विविध सूचना दिल्या. पाणी पुरवठाच्या दिवशी पाणी वाया जाऊ नये, यासाठी उपाययोजना राबवण्यावर त्यांनी भर दिला. विभागीय अधिकारी पाणीपुरवठा विभागाच्या अधिकार्यांची संयुक्त बैठक घेऊन दर तीन दिवसांआड नियोजित पाणीपुरवठा यशस्वीरीत्या कसा करता येईल, यावर सविस्तर चर्चा करण्यात आली. या बैठकीस प्रभारी कार्यकारी अभियंता सतीश एकबोटे, हिदायत मुजावर, सिध्देश्वर उस्तुरगे, सर्व विभागीय अधिकारी तसेच पाणीपुरवठा विभागातील अधिकारी उपस्थित होते.
मुख्य कार्यालय पाणीपुरवठा विभाग यांच्याकडून तीन दिवसांआड पाणीपुरवठा करण्याचा प्रयत्न सुरू केला आहे. या नियोजनाच्या अंमलबजावणीसाठी विभागीय कार्यालये आणि पाणीपुरवठा विभागातील अधिकारी व कर्मचारी यांनी समन्वय साधत योग्य नियोजन करावे. प्रत्येक विभागीय कार्यालयाने सार्वजनिक आरोग्य अभियंता विभागाकडून दिलेल्या सूचनेनुसार आपापल्या हद्दीत पाणी वितरण वेळापत्रकानुसार हा पाणीपुरवठा सुरळीत ठेवण्यात यावा.