सोलापूर : ट्रेडिंगमधून दरमहा जादा परताव्याचे आमिष दाखवून सात जणांची 21 लाख 50 हजार रुपयांची फसवणूक झाली आहे. रंजना रमेश पवार (वय 56, रा. उमानगरी, सोलापूर) यांनी फौजदार चावडी पोलिसात फिर्याद दिली आहे.
या संदर्भात पोलिसांच्या माहितीनुसार, रंजना आणि आरोपी राजकुमार विठ्ठल थिटे (वय 42, रा. बार्शी) याची कोकिळा कोळी यांच्या घरी ओळख झाली. ट्रेडिंगमधून दरमहा जादा परताव्याचे आमिष थिटे यांने दाखविले. सुरुवातीला पवार यांनी आठ हजार रुपये दिले. त्यातून दरमहा पैसे देऊन आरोपीने पवार यांचा विश्वास संपादन केला.
त्यानंतर थिटे याने एक लाख रुपये दिले तर दरमहा 10 हजार 800 रुपये देण्याचे आमिष दाखवले. त्यानंतर पवार यांनी त्यांच्या बहिणी, तिची दोन मुले तसेच विजय किसन मोरे, एकनाथ चव्हाण, रवी पठारे या सर्वांनी मिळून थिटे यास वेळोवेळी 21 लाख 50 हजार रुपये दिले.
दोन महिने परतावा दिल्यानंतर मे 2024 पासून थिटे याने पैसे देणे बंद केले. सगळ्यांनी मिळून पैशासाठी तगादा लावल्यानंतर त्याने नोटरी करुन दोन चेक दिले. परंतु त्यानंतरही तो पैसे देण्यास टाळाटाळ करु लागला.
त्यामुळे पवार यांनी फसवणूक झाल्याची तक्रार दिली आहे. त्यानुसार राजकुमार थिटे याच्या विरोधात फौजदार चावडी पोलिसात गुन्हा दाखल करण्यात आला आहे.