सोलापूर : राज्यातील विनाअनुदानित खासगी व्यावसायिक शिक्षण संस्थांकडून शुल्क निश्चितीबाबत अनेकदा पारदर्शकता पाळली जात नसल्याच्या तक्रारी वाढल्या आहेत. या पार्श्वभूमीवर, शुल्क नियामक प्राधिकरणाने (एफआरए) आता आक्रमक पवित्रा घेतला असून, संस्थांच्या मनमानी कारभाराला लगाम घालण्यासाठी कडक पावले उचलली आहेत.
या शैक्षणिक वर्षासाठी शुल्क निश्चितीचे नियम प्राधिकरणाने स्पष्ट केले आहेत. अनेक महाविद्यालये प्रशासकीय खर्चाच्या नावाखाली किंवा इतर सोयी-सुविधांचे कारण देत विद्यार्थ्यांकडून अवाजवी शुल्क उकळतात. अशा तक्रारींची गंभीर दखल घेत, प्राधिकरणाने सर्व संस्थांना पारदर्शक राहण्याचे आदेश दिले आहेत. नियमांचे उल्लंघन करून जादा शुल्क आकारल्यास संबंधित संस्थेवर थेट कायदेशीर कारवाई करण्याचा इशारा देण्यात आला आहे.
अनेक व्यावसायिक महाविद्यालयांमध्ये प्रवेश घेणाऱ्या विद्यार्थी आणि पालकांसाठी हा दिलासा मानला जात आहे. या निर्णयामुळे शिक्षण संस्थांना आता प्रत्येक खर्चाचा हिशेब द्यावा लागणार असून, विनाकारण शुल्क वाढवता येणार नाही. प्राधिकरणाच्या या ॲक्शन मोडमुळे शिक्षण क्षेत्रातील आर्थिक गैरप्रकारांना चाप बसण्याची शक्यता वर्तवण्यात येत आहे.