माढा : तालुक्यात झालेल्या अतिवृष्टीत व सीनेच्या महापुरामुळे महावितरणचे सुमारे 15 कोटी रुपयांचे नुकसान झाल्याचा अंदाज असून माढा उपविभागांतर्गत 220 डीपींचे नुकसान झाले आहे. ही कामे महावितरणकडून आता युद्धपातळीवर सुरू आहे. नदीकाठीच्या मोटारी सुरू झाल्यानंतर सुरळीत वीज पुरवठ्याचे आव्हान महावितरण पुढे असणार आहे.
माढा तालुक्यात मे महिन्यातच काही मंडळात तर सप्टेंबरमध्ये संपूर्ण तालुक्यात अतिवृष्टी झाली होती. सप्टेंबर महिन्यात सीना नदीला आलेल्या महापुराने नदीकाठी असलेल्या माढा विभाग अंतर्गत येणाऱ्या खैराव, कुंभेज, वाकाव, उंदरगाव, केवड, दारफळ, निमगाव मा. राहुलनगर, चव्हाणवाडी व मानेगाव परिसरातील काही भागात वीज वितरण कंपनीच्या नेटवर्कचे मोठ्या प्रमाणात नुकसान झाले होते. या भागातील 220 डीपींचे नुकसान झाले होते.
आता महावितरणने डीपी उभारणीचे काम वेगाने सुरू केले आहे. आतापर्यंत 14 डीपी उभारण्यात आल्या असून 22 डीपी उभारणीचे काम प्रगतिपथावर आहे. शेतात उभे असलेल्या पिकामुळे शेतकरी डीपी उभारण्याच्या कामास अडथळा निर्माण करत आहेत. यामुळे तीन ठिकाणच्या डीपींची कामे खोळंबली आहेत. कुभेज येथील उपकेंद्र पुराच्या पाण्याखाली गेले होते, ते दिवाळीपूर्वी सुरू करण्यात आले आहे.