पंढरपूर : वसुबारसपासून दीपावली महोत्सवास सुरुवात झाली आहे. यानिमित्त पोशाखावेळी दरवर्षी प्रथा, परंपरेप्रमाणे वसुबारसपासून ते दिवाळी पाडवापर्यंत श्री विठ्ठल-रुक्मिणीला विविध अलंकार परिधान करण्यात येत आहेत.
श्री विठ्ठलास सोने मुकुट, कौस्तुभ मणी, हिऱ्याचा कंगण जोड, दंडपेट्या जोड मोठा, मोत्याचा तुरा, मोत्याची कंठी 2 पदरी, मारवाडी पेट्याचा मोत्याचा हार, शिरपेच मोठा 10 लोलक असलेला, मत्स्य जोड, तोडे जोड इत्यादी अलंकार परिधान करण्यात आलेले आहेत. श्री रुक्मिणीमातेस सोने मुकुट, वाक्या जोड, तोडे जोड, तारवाड जोड, चिंचपेटी तांबडी, जवमनी पदक, जवेच्या माळा, लक्ष्मीहार, मोहोरांची माळ, पुतळ्यांची माळ, हायकोल, सरी, कंबरपट्टा इत्यादी पारंपरिक अलंकार परिधान करण्यात आलेले आहेत.
कार्यकारी अधिकारी राजेंद्र शेळके यांनी सांगितले की, दीपावलीत वसुबारस, दिवाळी पाडवा, नरकचतुर्दशी आणि लक्ष्मीपूजनाच्या निमित्ताने श्री विठ्ठल-रुक्मिणी मंदिर, तुकाराम भवन, श्री ज्ञानेश्वर दर्शन मंडप व भक्त निवास इत्यादी ठिकाणी आकर्षक विद्युत रोषणाई करण्यात आलेली आहे. तसेच संपूर्ण विठ्ठल मंदिर आणि मंदिर परिसरात मोठ्या संख्येने पणत्या लावून दीपोत्सव साजरा करण्यात येणार आहे.