पंढरपूर : श्री विठ्ठल-रुक्मिणी मंदिराची संवर्धनाची कामे पुरातत्त्व विभाग व संबंधित कंत्राटदारांनी वेळेत पूर्ण करावीत. कामे गुणवत्तापूर्ण करावीत. कामाला निधीची कमतरता भासू दिली जाणार नाही. तत्काळ निधी शासनस्तरावरुन उपलब्ध करून देण्यात येईल, असे राज्याचे जलसंपदा व आपत्ती व्यवस्थापन मंत्री गिरीश महाजन यांनी सांगितले.
मंत्री गिरीश महाजन यांनी शनिवारी सहकुटुंब श्री विठ्ठल- रुक्मिणीमातेचे दर्शन घेतले. यानंतर ते बोलत होते. श्री विठ्ठल-रुक्मिणी मंदिर व परिवार देवता मंदिराचे जतन व संवर्धनाचे काम पुरातत्त्व विभागाच्या मार्गदर्शनाखाली सुरू आहे. जलसंपदा व आपत्ती व्यवस्थापन मंत्री गिरीश महाजन यांनी सदर कामांची पाहणी केली. यावेळी मंदिर समितीच्यावतीने मंदिर समितीचे सदस्य ज्ञानेश्वर महाराज जळगांवकर व शकुंतला नडगिरे यांच्या हस्ते शाल व श्री विठ्ठल-रुक्मिणीची मूर्ती देऊन सत्कार करण्यात आला.
मंत्री महाजन म्हणाले की, पुरातत्त्व विभाग व संबंधित कंत्राटदारांनी सदर कामास गती देऊन ती वेळेत व गुणवत्तापूर्ण करावीत. सुरू असलेल्या कामांच्या उपलब्ध निधीची माहिती घेतली. उपलब्ध निधीची कमतरता भासल्यास तात्काळ निधीची उपलब्धता शासनस्तरावरुन येईल, असेही त्यांनी यावेळी सांगितले.
यावेळी आमदार समाधान आवताडे, माजी आमदार प्रशांत परिचारक, सोलापूर शहरचे पोलिस आयुक्त एम. राज कुमार, उपविभागीय अधिकारी सचिन इथापे, उपविभागीय पोलिस अधिकारी डॉ. अर्जुन भोसले, जलसंपदा विभागाचे अधीक्षक अभियंता खांडेकर, प्र. तहसीलदार सचिन मुळीक, कार्यकारी अभियंता सोमशेखर हरसुरे, जिल्हा आपत्ती व्यवस्थापन अधिकारी शक्तीसागर ढोले यांच्यासह मान्यवर पदाधिकारी उपस्थित होते. यावेळी मंदिर समितीचे व्यवस्थापक मनोज श्रोत्री यांनी श्री विठ्ठल-रुक्मिणी मंदिरात सुरू असलेल्या व करण्यात येणार्या कामांची माहिती दिली.